УИХ-ын чуулганы өчигдрийн хуралдаан оройн 18.00 цаг гэхэд дууссан юм. Харин чуулганы танхимаас УИХ-ын гишүүн С.Эрдэнэ, Э.Мөнх-Очир нар хэрэлдсээр гарч ирэв. С.Эрдэнэ гишүүн “Муу бацаан минь. Чамайг ийм гэж бодсонгүй” гэх нь сонсдоно. Цаанаас нь Э.Мөнх-Очир гишүүн дуугүй байсангүй тул С.Эрдэнэ гишүүн “Юу гэнэ ээ” хэмээн түүн рүү очоод бараг л цохиод авах нь уу гэлтэй дүрэлзэв. Харин Сангийн сайд Д.Хаянхярваа тэдний дунд зохицуулж С.Эрдэнэ гишүүнийг цааш дагуулан явлаа. Уурандаа багтарсан С.Эрдэнэ гишүүн замдаа “Дандаа шударга царайлдаг юм, энэ бацаан. Муу янхан” гэсээр явж одов.

Араас нь Э.Мөнх-Очир гишүүн Д.Зоригт сайд, Д.Очирбат гишүүнийг дагуулан “П”-гээр эхэлсэн хараал урсган алхав. Тэдний хэрүүл Боловсролын тухай хуульд оруулах өөрчлөлтөөс болжээ. Энэ хуульд хувийн хэвшлийн ерөнхий боловсролын болон их, дээд сургуулиудын багш, ажилчдын мэргэжил дээшлүүлэх сургалтын төлбөрийг төрөөс төлөхөөр тусгагдсан юм.

Мөн улс, хувийн гэж ялгалгүй бүх сургуулийн багш ажилчдад улсаас тэтгэмж олгохоор болоод байгаа. Үүнийг нь Э.Мөнх-Очир, Д.Очирбат нарын гишүүд эсэргүүцсэн учраас төсөл санаачлагч С.Эрдэнэ гишүүн хуулийн хэлэлцүүлгээ хойшлуулчихаад ийн ууртай гарч ирсэн юм байна. Тэрээр чуулганы танхимд Э.Мөнх-Очир гишүүнийг “Хүрэлсүхдээ зодуулж байхдаа таарсан амьтан” гэсэн бол Э.Мөнх-Очир гишүүн “Даргадаа зодуулах зүгээр байдаг юм” хэмээсэн.

Я.Цэцэг