Н.Энхбаярыг СЕХ бүртгэхгүй гэдэг нь тодорхой байсан гэхэд болно. Гэвчиг Н.Энхбаяр болон түүний гишүүн дэмжигчид СЕХ тийш эсэргүүцлээ илэрхийлэн тэмцсээр байгаа юм. Түүнийг СЕХ бүртгэхээс татгалзсан үндэслэлүүдийг нь харвал:

-Нэр дэвшигчийн бүрдүүлэх ёстой баримт, бичиг дутуу. Тухайлбал, хилийн албаны тодорхойлолт хавсаргаагүй.

-Ял шийтгүүлж байгаагүй гэсэн шаардлагыг хангаагүй. Өөрөөр хэлбэл, ялтайд тооцох хугацаа дуусаагүй. Цагдаагийн ерөнхий газрын тодорхойлолт болон Сүхбаатар дүүргийн шүүгчийн захирамжид дурдсанаар түүнийг ялтайд тооцох хугацаа 2017 оны наймдугаар сарын 2-нд дуусах аж. Мөн Ерөнхийлөгчийн сонгуульд нэр дэвшигч нь 5-аас доошгүй жил эх орондоо тасралтгүй оршин суусан байх шаардлага хангаагүй.

Тодруулбал, Н.Энхбаяр нь 2013 оны 8 дугаар сарын 13-наас 2014 оны 10 дугаар сарын 9-ныг хүртэл буюу 13 сарын турш эх орондоо байгаагүй гэж үзэж бүртгэхээс татгалзсан байгаа юм.

Тэгэхээр эдгээр үндэслэлүүдийг харахад Н.Энхбаяр өөрийг нь ялтайд тооцох тухай асуудал дээр л хэлж ярьж тэмцээд байгаагаас бус Ерөнхийлөгчийн сонгуульд нэр дэвшигч нь 5-аас доошгүй жил эх орондоо тасралтгүй оршин суусан байх шаардлага энэ тэртэй зөрчилдсөн асуудал энэ тэрээ бол нэг их ярихгүй байгаа юм, эхнээсээ. Ерөнхийдөө бол МАХН-аас нэр дэвшигч Н.Энхбаярын хувьд СЕХ-ны босгыг давах нь тодорхой бус байсантай зэрэгцээд, МАХН-д хоёр дахь хувилбар бий юу гэдэг асуудал яригдаж байсан. За харин МАХН-ынхан бидэнд Н.Энхбаяраас өөр хувилбар байхгүй, 100 хувь дэмжиж Н.Энхбаярыгаа нэр дэвшүүллээ гэж байсан ч, нөхцөл байдал тэдэнд тулгаж байна.

Монгол Улсын Ерөнхийлөгчийн  сонгуулийн тухай  хуулиар бол  МАХН-аас Ерөнхийлөгчийн сонгуульд нэр дэвшигчийг нөхөн нэр дэвшүүлэх боломжтой гэдгийг хэлэх хэрэгтэй биз. Тус хуулийн 28.1-д намаас нэр дэвшигч нас нөгчсөн, эсхүл шүүхээр ял шийтгүүлсэн тохиолдолд тухайн нам нь өөр хүнийг нөхөн нэр дэвшүүлэх шийдвэрээ Сонгуулийн ерөнхий хороонд санал авах өдрөөс 30 хоногийн өмнө ирүүлж болно хэмээн зааж өгсөн байдаг. Тэгэхээр МАХН хуулийн боломжийг эдлэх үү гэдэг нь удахгүй тодорхой болох биз ээ. За тэгээд С.Ганбаатар уу, Л.Эрдэнэчулуун уу, Ц.Шаравдорж уу гээд нэр дэвшигчийн тухай сэдэв дахин өрнөх нь.

Эх сурвалж: Шуурхай.мн