Эрүүгийн хэрэг шүүхэд хянан шийдвэрлэх тухай хуулийн төсөлд хүний эрхийг дордуулсан хэд хэдэн заалт байгаа учраас ажлын хэсэг эргэж харах шаардлагатай гэж АН-ын бүлэг үзэж буй. Тэгвэл Хүний эрхийн хуульч гэх тодотголыг нэрнийхээ өмнө бичүүлж ирсэн М.Ичинноров хэлэхдээ  “Ер нь Эрүүгийн байцаах шийтгэх хууль, Зөрчлийн хуулийг Засгийн газар урьдах парламентын баталсан байсан хуулийн байдлыг дордуулж оруулж ирснийг УИХ-ын ажлын хэсэг улам дордуулж оруулж ирж байгаа. Жишээ нь, Зөрчлийн хуулийн гол үзэл баримтлал нь Монгол улсыг шоронжсон үндэстэн байхаас сэргийлэхийг зорьж хийсэн. Жижиг сажиг хэрэг үйлдсэн залуусыг олон жил шоронд явуулахын оронд зөрчлийн хуулиар торгууль, нийгмийн тустай ажил хийлгэх зэргээр шоронгийн  бус шийтгэл оноох зорилготой байсан. Гэтэл энэ байдлыг улам дордуулж, эргээд шоронжсон улс байхаар оруулж ирж байна. Дуртай юмаа нэмээд баривчилдаг л болгож байгаа. Жижиг сажиг үйлдэл бүр дээр баривчлах, цагдаа хуулийн байгууллагын өмнө уяастай байдлыг бий болгож байгаа юм. Эрүүгийн байцаан шийтгэх хуулийн хувьд бол олон ухралт байна. Ер нь энэ парламентын хувьд зарчмын, концепцийн, хандлагын маш том ялгааг би олж харж байна. Өмгөөлөгчдийн эрх, оролцоо маш хязгаарлагдмал байна. Иргэд эрүүгийн хэрэг дээр их мөнгө төлж, өмгөөлөгч авна. Тэгээд тэднийх нь гар уяастай, хөл нь тушаатай, ам нь үдээтэй байхаар мэтгэлцэх зарчмын утга алдагдаж, яллах талдаа илүү давуу эрх мэдэлтэй, өмгөөлөх, хамгаалах тал нь ямар ч эрх мэдэлгүй байхад өмгөөлөгч гэж байгаад, иргэд мөнгөө төлсний гавьяа юундаа гарах билээ? гээд олон асуудал энд ярихаар байгаа юм.” гэж байна.

Эх сурвалж: Шуурхай.мн