Төсвийн тодотгол хэлэлцэх үед шуугиан дагуулсан асуудал бол  концессын гэрээтэй холбоотой мэдээлэл байсан. Тэгвэл УИХ дахь АН-ын бүлгийн гишүүн Б.Пүрэвдорж уг асуудлаар байр сууриа илэрхийлэхдээ “Төсвийн тодотголыг хэлэлцэхэд концессын гэрээнүүдийг заавал хамт оруулж ирэх ёстой. Улсын төсвөөс барих, шилжүүлэх нөхцөлтэйгөөр хийгдэж, тодорхой хэмжээний мөнгө зарцуулж байгаа учраас зайлшгүй хэлэлцэх ёстой. Олон нийтээс шүүмжлэл дагуулаад байгаа концессын асуудлууд нь Засгийн газрын гишүүдийн нэртэй холбогдож байгаа гэсэн мэдээлэл бий. Долоон концессын гэрээний нийт үнийн дүн 850 орчим тэрбум төгрөг болсон байсан. Энэ бол их мөнгө. Ялангуяа долоон ширхэг бүтээн байгуулалтад   ийм  хэмжээний мөнгө зарцуулна гэдэг байж болшгүй. Энэ мөнгийг Засгийн газрын өнөөгийн бондоор тооцох юм бол жилд нэг их наяд төгрөгийн зардал гарна гэсэн үг. Тиймээс АН-ын бүлэг энэ асуудалд хариуцлагатай хандах ёстой гэсэн байр суурийг илэрхийлж байгаа. Нэг км замыг ойролцоогоор тэрбум 500 орчим сая төгрөгөөр барина гэдэг өндөр өртөг. Энэ асуудалд тодорхой хэмжээгээр улстөрчдийн болон төрийн өндөр албан тушаалтнуудын сонирхол орсон байх магадлалтай гэж хардаж байгаа.” гэж байна.

Эх сурвалж: Шуурхай.мн