“Итгэл сэтгэлийн гүүр” ТББ-ын тэргүүн Ц.Сувд-Эрдэнэ өөрийн цахим хуудсандаа ийнхүү бичжээ.

“Бид гурав ингээд Цагаандарьт туслах аянаа албан ёсоор хаагаад гудамжаараа алхаад харилаа даа. Ерөөлтням дүү маань 3 өдөр тасралтгүй байлцаж бүх ажлыг зохицуулж байсан. Отгонжаргал маань хүмүүсээс дамжуулсан зүйлсийг цуглуулж гадуур гүйх ажилд тууштай шогшсон. Гэх мэт сэтгэл зүрхээрээ дэмжсэн мянга мянган залуус ах эгч, дүү нарын минь хамтын хүчээр босгосон зүйлсээ хараад сэтгэл өөдрөг дуу аялан алхнаа . .” хэмээжээ. 

Мөн “НЭГНИЙГЭЭ ТҮШИХ НИНЖИН СЭТГЭЛТЭЙ ТҮМЭН ЦАГААНДАРИЙН АМЬДРАЛЫГ ЭРС ӨӨРЧИЛЛӨӨ.

Хоёр үрээ тэврээд хонох газаргүй явна гэсэн мэдээлэлийг аваад хар хурдаараа очсон тэр өдөр 24 хоногийн өмнө байлаа. Яах учраа мэдээгүй ч туслах ёстой гэсэн чин хүсэл байсан юм. Гэтэл сайхан сэтгэлт нэгэн сувилал ээж охидыг аваад ир гэснээр олон олон хүний тусламжийн цуваа 24 өдрийн туршид тасралтгүй үргэлжиллээ. Туслаж дэмжиж эд материалын болон мөнгөн хандив өргөсөн, эмчилгээ сувилагаа үзүүлсэн мөн үргэлж урам зориг хайрласан монголын бүх ард түмэндээ чин сэтгэлээсээ талархал илэрхийлье.
Тухайн үед 4 ханатай хуучин гэрийн үнийг дотроо бодож явсан бол харин одоо бол хашаа байшин, 5 ханатай цоо шинэ гэр, эрүүл мэнд, ажил бүгд бүрдсэн дутуу зүйлгүй сайхан айл боллоо. Буянт хүмүүний буян заяа тэгширч булаг мэт ундарч байх болтугай. Эх орон минь энх тунх элгэн садан минь эрүүл байж ирээдүй хойч маань их зүйлсийг бүтээх болтугай.