Оффшор, оффшорчдын эсрэг тэмцэгчид 2017 оны 04 сарын 15-ны бямба гарагт Сүхбаатарын талбайд цугларлаа. Тэнд тэд эсэргүүцлээ илэрхийлж,  хандив цуглуулж, олон нийтээс гарын үсэг цуглуулж,  хүмүүс ч  өөр өөрийн байр суурийг илэрхийлсэн.  Тэдний тэмцлийг үгүйсгэхгүй ээ. Харин  сэтгүүлч миний хувьд  хүүхдүүдээс гарын үсэг авч байгаа үйлдлийг ёс зүйгүй явдал гэж харж байгаа юм. Тэмцэгчид эл үйлдлээ  сошиалаар  бахархалтайгаар зарлаж “Оффшорыг эсэргүүцэж хүүхдүүд минь хүртэл ирж гарын үсгээ зурж байна” гэсэн постууд урсгажээ.

Хүүхэд шүү дээ. Юугаа ч мэдэхгүй бяцхан хүүхэд ямар учиртай цаасан дээр ямар учраас гарын үсэг зурж байгаагаа мэдэж байгаа болов уу? Хүүхдийн эрх яриад байдаг төрийн болон төрийн бус байгууллагууд хаана байна вэ.

Улс төрийн үйл ажиллагаанд хүүхдийг татан оруулах нь томчуудын ёс зүй хэр хэмжээнд байгааг харуулж байгаа хэрэг.  “Хүүхдийн эрхийг хамгаалах тухай хууль”-нд “…Хүүхдэд үндэсний аюулгүй байдлын эсрэг үйл ажиллагаа явуулах, терроризм болон бусад  гэмт хэрэг, садар самуун, хүчирхийллийг сурталчлах,  сурталчилгаанд ашиглахыг хориглоно” гэж заасан байдаг. Хуулиараа ч тэр, Монгол уламжлалаа харсан ч тэр оюун ухаан нь төлөвшиж амжаагүй бяцхан хүүхдүүдээс гарын үсэг авч, түүгээрээ бахархан олон нийтэд түгээнэ гэдэг бол хүний мөн чанарт үл нийцэх үйлдэл байлаа.

Эх сурвалж: Шуурхай.мн