Сүүлийн үед гэр бүл салалт ихэсч дунд нь хүүхдийн эрх ашиг, сэтгэлзүйн асуудал хөндөгдөж үүнтэй холбоотой хэрэг төвөг ч өдөр ирэх тусам нэмэгдэж нийгмийг цочроож байна. Гэр бүлийн хүчирхийллээс болж нөхөр нь эхнэрээ хөнөөх, төрсөн эцэг нь бяцхан үрийнхээ амийг хороох, өсвөр насны охид амиа хорлох зэрэг гэмт хэргүүд улам олширсоор байгаа нь харамсмаар. Гэвч дахин нэг гэр бүлийн хувь тавилан орвонгоороо эргэсэн харамсалтай хэрэг өнгөрсөн ням гараг буюу дөрөвдүгээр сарын 9-нөөс 10-нд шилжих шөнө Сонгинохайрхан дүүрэгт гарчээ. Тодруулбал, тус дүүргийн 16-р хороо, “Хархорин” захын ард талын тоот байранд 17 настай Б гэгч өөрийн төрсөн эцэг болох 48 настай М-ийг хэвлийн тус газарт нь олон удаа хутгалж амь насыг нь бүрэлгэжээ. Уг хэргийн шалтгаан нь гэр бүлийн салалтаас үүдэлтэй бөгөөд сэтгэл санааны гутралд орсон хүү аавыгаа ихэд буруутгадаг байсан гэнэ. Тухайн өдөр хүү нь орой гэртээ ирэхэд аав нь ирчихсэн байсан бөгөөд хоорондоо маргалдсаны эцэст аавыгаа хутгалж хохирч М газар дээрээ нас баржээ. Сэжигтэн Б үүрийн 04:00 цаг орчимд өөрөө цагдаагийн байгууллагад дуудлага өгч хэргийн газраас зугтаасан байжээ. Тэрээр “Болсон үйл явдлыг тодорхой санахгүй байна. Аавыгаа хөнөөснөө мэдээд маш их айж балмагдсан. Яах урчаа олохгүй цагдаад дуудлага өгчихөөд айсандаа зугтсан” хэмээн мэдүүлсэн байна. Одоогоор сэжигтэн Б-г ШШГЕГ-ын харъяа хүүхдийн хорих ангид түр саатуулан мөрдөн байцаалтын ажиллагаа явуулж байна. Тус байрны оршин суугчид талийгчийг архи хаяадаа амсчихдаг, эхнэрээ зоддог байсан талаар мөн хүүг ойр орчмын орцонд найзуудтайгаа архи уудаг байсан гэх мэт мэдээллийг өгөөд байгаа юм.

Эх сурвалж:Шуурхай.мн