УИХ-ын дэд дарга Ц.Нямдорж өнөөдөр хэвлэлийнхэнд С.Зориг агсны амь насыг хөнөөсөн хэрэгтэй холбоотойгоор мэдээлэл хийлээ. Тэрбээр “Сэтгүүлчид та бүхэн энэ мэдээллийг олон нийтэд хүргэчихвэл сайн байна. С.Зоригийн хэргийг маш нууцын зэрэглэлд авсан. Нууцыг хадгалах хугацаа 25 жил. Хамгийн гол нь захиалагч. Захиалгаар алсан гэх хэр нь захиалагч байхгүй.1937 оны хэлмэгдүүлэлтийн үеийн арга барил одоо ханхлаад байна. Энэ бол аюул. Цаашид захиалагчийг илрүүлэх малгайн дор хэчнээн хүний амьдралыг сүйрүүлэх юм. Хэрэг гарах үед байсан цор ганц амьд гэрч Булганыг бүтэн жил хорьчихоод гэрч ч биш, хохирогч ч биш болголоо. Шүүх хуралд оруулдаггүй. Тэгсэн хэр нь тэр хүний ам зургаар хүнийг яллаад байдаг. Ядаж л чиний хэлж зуруулсан хүн мөн үү, үгүй юу? гэж асуумаар юм” хэмээн хэлж байна. Тэрбээр хэлэхдээ хоёр шатны шүүх хурал хаалттай явагдлаа. Шүүх хурлын дараа прокурорууд зарим баримт задалж байна гэж мэдээллүүд хийсэн. Тэр мэдээллийн дараа би телевээр ярилцлага өгсөн. Байдал их ээдрээтэй байгаа учир хэдийгээр миний хариуцсан ажил биш ч гэсэн Монголын хууль хяналтын үйл ажиллагаа, хүний эрхийн асуудлыг хөндөж мэдээлэл хийхээр шийдсэнээ мэдээллийн эхэнд хэлж байсан юм. Түүнчлэн Ц.Нямдорж дарга Ц.Амгаланбаатартай холбоотой анхаарал татсан мэдээллүүдийг хэлж ярьсан.

Гэхдээ нэг зүйлийг тодотгоход, Ц.Нямдорж даргын хэлж ярьж буй зүйлсийг өмнө нь Т.Чимгээ, Б.Содномдаржаа  нарын ар гэрийнхэн хэлж ярьж байсан гэдгийг хэлэх хэрэгтэй байх. Ялангуяа Ц.Амгаланбаатар хоригдож байгаа хэрнээ Б.Содномдаржаа, Т.Чимгээ нарын үйлдлийг андахгүй мэдэж, мессежээр дарамталдаг байсныг өмнө нь гэр бүлийнхэн нь хэвлэлийнхэнд мэдээлж байсан билээ.

Тэгвэл Ц.Нямдорж гишүүн өнөөдөр мэдээлэл хийх үеэрээ хэлэхдээ  Ц.Амгаланбаатар гэдэг хүн 2007 онд үерхэж байсан найзаа зодож гэмтээгээд цагдаад шалгагдаж эхэлсэн юм байна. Үүнээс хойш дөрвөн хүний амийг би хохироосон гэж худал мэдүүлэг өгсөн. Нэг хэрэгт холбогдуулж өөр хүнийг гүтгэж, тэр хүн нь бараг жил шахам шалгагдаж байж хэрэгт холбогдолгүй болсон байх юм. Эхнийх  нь 2004 онд Эрдэнэтэд Өлзийсайхан гэдэг  хүний амийг Эрдэнэбаатар гэдэг хүн хохироосон гэж мэдүүлэг өгсөн. Энэ мэдүүлэгт нь үндэслээд Эрдэнэбаатарыг  жил шахам хорьсон. Сүүлд нь өөрөө хэрэг хийсэн нь батлагдаж, хэргээ хүлээсэн. 2009 онд цаазаар авах ял шийтгүүлсэн. Уучлаад, 5 жил нь гянданд, 20 жил нь чанга дэглэмтэй хорих ангил ял эдлүүлэхээр болсон. Ингэж ял шийтгүүлж байхдаа “Надад үйлдсэн бас нэг хэрэг байгаа. Та нар намайг хүнтэй уулзуул, би Ганбат гэдэг хүний амийг хохироосон” гэж мэдүүлэг өгсөн. Самарт яваад нэг шил архи хувааж уугаад хоорондоо маргалдаад зүрхэн тус газарт нь хутгалж амийг нь хохироосон гэсэн байдаг.  Харин Цагдаагийн байгууллагын шалгалтаар Ц.Амгаланбаатарын мэдүүлэг хэрэг гарсан үйл явдлаас зөрсөн. Ингэж хуурамч мэдүүлэг өгч баахан бужигнуулсан хүн. Дээр дурьдсан Эрдэнэбаатар нь Ц.Амгаланбаатарын багаасаа үерхсэн бараг цор ганц найз нь. Хойд гудамжных нь хүн юм байна. Ганбат гэдэг хүний аминд хүрсэн гэж ярихдаа Балжинням, Эрдэнээ гэж хоёр хүний нэр хэлж байсан. Энэ хүмүүс одоо бурхан болсон. Ц.Амгаланбаатарын хойд эцэг Доржсүрэнтэй хамт ажиллаж байсан. Эрдэнээ нь талийгаачийн хүргэн байсан байх юм. Өөрөөр хэлбэл өмнөх хэрэгтээ найзаа гүтгэсэн. Дараа нь Ганбат нас барахад хойд эцгийнхээ таньдаг хүмүүсийг гэрчээр татсан байна. Үүний дараа ял эдэлж байхдаа 2003 онд Архангайн Цэнхэр суманд гурван хүний аминд халдсан гэж ярьсан нь Цагдаагийн байгууллагын шалгалтаар бас холбогдолгүй болсон байна. Энэ бол эхний таван хүн амины хэрэгтэй холбоотой зүйл” хэмээн ярьж байна.

Тэгэхээр УИХ-ын дэд дарга Ц.Нямдоржийн хэлж ярьж буй мэдээлэл нь Ц.Амгаланбаатар гэж хүн хийгээгүй хэргийг ч өөр дээрээ үүрэх гэдэг хүн үү гэдэг асуултыг яах аргагүй тавихад хүргэж байгаа юм.

За мөн Ц.Амгаланбаатар шоронгоос Б.Содномдаржаа руу 120 гаруй мессеж бичиж, дарамталсан баримтыг тэрбээр дэлгэсэн. Түүнчлэн Ц.Амгаланбаатар яагаад таван хүний амь хөнөөсөн гэж худал мэдүүлэг өгч байв.  Яагаад шоронд утастай болчихов. Яагаад шоронд ороод таван жил болсон хүн Б.Содномдаржаа, Т.Чимгээ нарын гар утсыг олж, ийм олон мессэж бичдэг юм. Яагаад шүүх хурал хаалттай болов.  Юуг нь нуув.  Яагаад шүүх хурал болоод, тогтоол гарсны дараа Улсын яллагч Үндэсний телевизээр мэдээлэл хийв. Яагаад өмгөөлөгчдөд нь өмгөөлөх бололцоо олгодоггүй юм гэх мэтээр тодорхойгүй зүйл их байгааг хэллээ.

Эх сурвалж: Шуурхай.мн