Тавантолгой-Гашуунсухайт чиглэлд “Энержи ресурс” ХХК 2010 оны тавдугаар сараас 239 км хатуу хучилттай авто замыг барьж, 2011 онд ашиглалтад оруулсан. Харин үүний дараа буюу Засгийн газрын 2013 оны 299 дүгээр тогтоолоор энэхүү замын өмчлөлийг “Эрдэнэс Монгол” ХХК-д шилжүүлсэн байдаг бөгөөд өдгөө “Гашуунсухайт автозам” ХХК засвар арчлалтыг хариуцан ажилладаг юм байна.

Тус замаар нүүрс тээвэрлэж буй тээврийн хэрэгслийн тоо жилээс жилд нэмэгдсээр байгааг “Гашуунсухайт авто зам” компанийн гаргасан дүн мэдээнээс харж болно. Тухайлбал, 2014 онд 36265, 2015 онд 30264, 2016 онд 516.163, 2017 оны нэг, хоёрдугаар сард 103.478 тээврийн хэрэгсэл нүүрс тээвэрлэжээ.

Түүнчлэн өнөөдрийн байдлаар 69 аж ахуйн нэгжийн 5147 автомашин нүүрс тээвэрлэж буй аж. Гэвч энэ замд зам тээврийн осол ихээр гарч, олон арван хүн амь нас, эрүүл мэндээрээ хохирдог.

Замын цагдаагийн албаныхны өгч буй мэдээллээр Тавантолгой-Гашуунсухайт чиглэлийн замд 2016 онд 1596 осол гарч, найман хүн нас барсан бол 2017 оны эхний гурван сард 536 осол бүртгэгдэж, долоон хүн амиа алджээ.

Эдгээр ослын дийлэнх нь согтууруулах ундаа хэтрүүлэн хэрэглэсэн, замын эвдрэл гэмтэл их зэргээс үүдэлтэй гэдгийг албаныхан онцолж байна.

Эх сурвалж:Eagle.mn