Тайз дэлгэцийн олон дүрийг чадварлагаар бүтээж үзэгч түмний хайр хүндэтгэлийг хүлээсэн жүжигчин гэвэл яах аргагүй Г.Золбоотыг хэлнэ. Тэрээр урлагт үнэнч хүчин зүтгэсэн хөдөлмөрөө төрөөр үнэлүүлж энгэрээ мялаалгаж ард түмний магнайг тэнийлгэсэн цаг саяхан. Тэгвэл шинэхэн гавъяат маань ээлжит нэгэн уран бүтээл болох “Зүрхний хилэн” УСК-нд ханцуй шамлан орсон сурагтай. Аавынхаа залгамж халааг түүчээлэхээр түүний царайлаг хүү З.Хангал ч мөн урлагийн замыг сонгож уран бүтээлийн их үйлсэд өөрийн гэсэн байр сууриа олохоор зэхэж буй гэнэ. Аавыгаа дагаж жүжигчин болох хүсэлдээ хөтлөгдсөн жаахан хүү байхдаа МУГЖ Б.Туяагийн зохиол “Өнгөт инээд” продакшны бүтээл “Зугтаарай” инээдмийн уран сайхны кинонд тоглож байсан тухай сонирхолтой түүхийг уншигч танд сонирхуулъя. Тухайн үедээ үзэгчдийг байлдан дагуулж байсан тус киноны найруулагчаар Г.Золбоот ажиллаж байсан бөгөөд хүүгийнхээ багын дүрийг дэлгэцэнд мөнхлөх завшааныг ашиглаад авсан нь энэ. Голын эргээс цүнх олдог хэсэг дээр ээжтэйгээ хамт гүйж явдаг хөөрхөн бор хүүг санаж байна уу? Тэр чинь одоогийн царайлаг залуу Хангал шүү дээ.

Мөн “Mamy Poko” хүүхдийн живхний реклам болох “Би аавдаа гомдсон” хэмээх богино хэмжээний кинонд тоглоод амжсан нь олон хүний хайрыг татсан. Аавын хар багаас нь бэлдсэн зүтгэл харин ч нэг талаар  болсонгүй урлагт эргэлт буцалтгүй хөл тавьсан түүний хүүг аав шигээ мундаг жүжигчин болноо гэж урлагийн томчууд урам хайрладаг гэнэ.

Эх сурвалж:Шуурхай.мн