Нийслэлийн тээврийн газар, “Улаанбаатар смарт карт” ХХК болон Том оврын автобусны үйлчилгээ эрхлэгчдийн холбооноос өнөөдөр сэтгүүлчдэд мэдээлэл хийлээ.

Тодруулбал, нийтийн тээврийн том оврын автобусанд байрлуулсан мөнгөний хайрцгийг хурааж байгаа бөгөөд ирэх дөрөвдүгээр сарын 1-нээс эхлэн зорчигчид зөвхөн смарт картаар зорчих юм байна. Тус ажлын хүрээнд иргэдийг картжуулахын тулд 3600 төгрөгийн картын үнийг өнөөдрөөс 2000 төгрөг болгон хямдруулан худалдаалж байгааг албаныхан онцоллоо.

Мөн ирэх дөрөвдүгээр сарын 1-ээс эхлэн 20 мянган картыг карт худалдах, борлуулах цэг байхгүй, картын талаар мэдээлэлгүй, бэлэн мөнгөөр зорчих гэж байгаа зорчигчдод үнэгүй тараах юм байна. Түүнчлэн, Сарын турш хязгааргүй зорчих эрхтэй картыг том хүн 25 мянга, хүүхэд найман мянган төгрөгөөр худалдаж авах боломжтой болох аж. Тус картыг “Улаанбаатар смарт карт” ХХК-ийн “хэрэглэгчийн төв” болон “Нийслэлийн үйлчилгээний нэгдсэн төв”-ийн Дүнжингарав, Драгон, Мишээл салбаруудаас худалдан авах аж.

Харин нийслэлд түр ирж байгаа орон нутгийн иргэд тухайн орон нутгийн чиглэлд явдаг авто вокзалуудад байрлах “Улаанбаатар смарт карт” ХХК-ийн үйлчилгээний цэгээс түр картыг 3600 төгрөгөөр худалдаж авч, өөрийн хэрэглээндээ тохируулан цэнэглэж, нийтийн тээврээр үйлчлүүлээд карт худалдан авсан цэгтээ буцаан өгч, 3600 төгрөгөө авах юм байна. Картын хэрэглээнд бүрэн шилжсэний дараа нийтийн тээврийн хяналтыг эрчимжүүлэх юм байна.

Шалгалтаар төлбөрөө төлөөгүй зорчигч илэрвэл авто тээврийн хуулийн дагуу 5000 төгрөгөөр торгох, албадан ажил хийлгэх арга хэмжээ авах аж. Мөн “цаашид нийтийн тээврээр үйлчлүүлж байгаа бүх зорчигчдыг картаар үйлчлүүлэх боломжийг олгохын тулд карт худалдаж аваагүй иргэдийг картжуулах ажлыг шат дараалалтай хийхээр төлөвлөж байгаа” гэв.

Т.Гэрэл