ОУВС-гийн хөтөлбөр хэрэгжи болсонтой холбоотойгоор талуудын байр суурийг бид хүргэж байгаа. МҮЭХ-ноос мэдээлэл хийхдээ гурван талт зөвшилцлийн хэлэлцээрийн заалтуудыг зөрчиж байгаа тул энэ хөтөлбөрийг эргэн харах ёстой гээд байгаа. Тэгвэл ардчилсан хувьсгалын анхдагчдын нэг Л.Бямбажаргал энэ талаар ярихдаа  “ОУВС-гийн тавьж байгаа шаардлагууд зүгээр л эрүүл эдийн засагч хүний тавьдаг шаардлагууд. Манай орны хувьд онцлогтой. Би ОУВС-г муу хэлэхгүй ээ, мэргэжлийн байгууллага учраас. Гэхдээ ОУВС-гийн нэг талыг нь ихээхэн ажиглаж байгаа.ОУВС-гийн манай улсын орж байгаа хөтөлбөрт ороод эдийн засгаа сайжруулсан улс байхгүй. Ер нь л иргэний дайн руу, дефолт руу л явсан. Та нар сэтгүүлч улс, судлаад үзээрэй. Аль оронд хэрэгжээд ямар үр дүнд хүрч вэ. Энэ тийм ч сайн биш, ганц хоёр оронд түр хэрэгжүүлэхэд хэрэг болсон. Украин зээлийн хөтөлбөр батлуулчихаад авч чадахааргүй болж, ерөнхийдөө улс байх, үгүй гэдэг асуудал яригдаж байна. Африкийн иргэний дайнтай НҮБ-ын цэрэг орчихсон газрууд эндээс эхэлсэн байдаг, эх сурвалж нь ийм. Энэ хөтөлбөр хэрэгжээд тэр. Хөтөлбөр эдийн засгийг агшаадаг.Төсвийн үрэлгэн зардлаа багасга, татвараа нэм гээд ерөнхийдөө бүсээ чангалах шаардлага тавьдаг. Тэгэхээр тэртэй тэргүй нийгмийн хоёр тийш хэт ялгарал явчихсан үед энэ хөтөлбөр хэнд хамгийн хүнд тусдаг вэ гэвэл дунд давхаргад.

Тэртэй тэргүй халамжийнханд их ч өгсөн, бага ч өгсөн адил идэж уугаад дуусгачихна. Баян хүн бол татвар их ч авсан, бага ч авсан хотойхгүй. Ингээд нийгмийн дунд давхаргынхан шууд доод давхарга руу шилждэг. Ийм учраас эдийн засгийн туйлшралыг нэмэгдүүлдэг. Зарим орон улс төрийн тогтолцоо нь дээшлэхгүй учраас дотооддоо дайн байлдаанд шилждэг, иймэрхүү. Гэхдээ би ОУВС-гийн хөтөлбөрийг тэр чигээр нь муу гэж хэлэхгүй.” хэмээн хэлж байна.