Ерөнхий сайд асан Н.Алтанхуяг маргааш 10.00 цагт АТГ-т очиж байцаалт өгнө гэдгийг түүний өмгөөлөгч Ц.Баасандорж хэлжээ. Н.Алтанхуяг АТГ-аас дуудсан цагт очихгүй, мөрдөн байцаалтын үйл ажиллагаанд саад учруулаад байгаа гэх мэдээлэл бий. Тэгвэл түүний өмгөөлөгч хэлэхдээ “Тийм зүйл байхгүй. АТГ-аас дуудсан цаг тухай бүрт нь очиж байцаалт өгч байгаа. Өнгөрсөн мягмар гаригт байцаалт авахаар дуудсан боловч Н.Алтанхуяг Хөвсгөл аймагт явж байсан. Тиймээс би мөрдөн байцаагчтай нь утсаар ярьж учир байдлаа хэлэн, улмаар ирэх пүрэв гаригт буюу маргааш 10.00 цагт байцаалт өгөхөөр товлосон байгаа…  Оны өмнө нэг, оны дараа нэг байцаалт авахаар дуудсан. Хоёр удаа дуудахад нь Ерөнхий сайд асан Н.Алтанхуяг гуай хоёуланд нь очиж байцаалтаа өгсөн. Харин өнгөрсөн мягмар гариг дуудахад яалт ч гүй амжихгүй учраас би цаг товлож маргааш байцаалтаа өгөхөөр болсон.” хэмээн хэлж байна. За харин Н.Алтанхуягийн эзэмшлийн компаниудад нэгжлэг хийсэн тухай асуудлаар хэвлэлд тайлбар хийхээс татгалзжээ.

Эх сурвалж: Шуурхай.мн