Маргааш  Сангийн яамнаас 11:00 цагт, ОУВС-гаас 13:00 цагт Төрийн ордны В танхимд хэвлэлийн бага хурал хийх тов тодорхой болоод буй. Монгол Улсын Засгийн газраас ОУВС-тай хийж буй хэлэлцээрийн талаар мэдээлэл хийх юм. Үндсэндээ талууд ямар ч байсан ойлголцолд хүрээд байна. УИХ дахь МАН-ын бүлэг ОУВС-гийн асуудлаар ээлжит бусаар хуралдаж, Засгийн газарт зөвлөмж хүргүүлсэн бөгөөд өчигдөр Засгийн газар  ээлжит бус хуралдаан хийсэн байгаа. Засгийн газрын хэвлэл мэдээлэл олон нийттэй харилцах хэлтсээс өгч буй мэдээллээр бол  Засгийн газрын гишүүд ОУВС-гаас тавьж буй нөхцөлтэй танилцсан, ямар нэг шийдвэр гараагүй гэж буй юм. Гэхдээ маргааш мэдээлэл хийх үеэрээ шийдвэртэй мэдээлэл талууд хүргэх биз. Учир нь МАН-ын бүлгээс ОУВС-гийн хөтөлбөрт хамрагдахыг дэмжсэн шийдвэр гаргачихаад байгаа юм.

Стэнд бай хөтөлбөрт хамрагдана гэсэн хүлээлт бидэнд байсан. Гэвч нөхцөл байдал хамаагүй дор байгаа учраас ОУВС-гаас манай  Засгийн газарт хамгийн хүнд нөхцөлтэй“Extended fund facility” хөтөлбөрийг хэрэгжүүлэх болзол тавьсан.  3-4 жилийн хугацаатайгаар хэрэгжүүлэх тус хөтөлбөр Монголд нутагших болвол эрх баригчдын эрх мэдлийг хүссэн хүсээгүй ОУВС  их хэмжээгээр хуваалцана.

ОУВС-ийн хөтөлбөрүүд хүссэн хүсээгүй хагас эрх мэдэл дагуулна гэдгийг бид ер нь бол эхнээсээ гадарлаж л байсан. Тэгэхээр өөр аргагүй бол урдах замаасаа гажих гээд яах билээ.

ОУВС-гаас хөтөлбөр өгөхдөө дагаад шаардлагуудыг тавьдаг гэдгийг бид мэднэ. Тухайлбал,  төлбөрийн балансын тэнцлийг хадгалах, өрийн хязгаарыг хангах, ДНБ-нд эзлэх төсвийн алдагдлыг бууруулах, эдийн засгийн өсөлтийг дэмжин ядуурлыг бууруулах, мөнгөний хатуу бодлого хэрэгжүүлэх, инфляцыг бууруулах, зээл хумих, банкны хяналтыг чангатгах, баялгийн санг бий болгох, үйлдвэрлэлийг төрөлжүүлэх гэх зэрэг олон шаардлагуудын өмнө бид бэлэн байгаа юу гэдэг асуулт сүүлийн хэдэн сарын туршид тавигдаж байгаа. За харин “Extended fund facility” хөтөлбөрийн тухай яригдсанаар эрх мэдлийн тун хэмжээ илүү хумигдах талаар нэмж яригдаж буй юм.

Эх сурвалж: Шуурхай.мн