Ардчилсан намын төлөөллүүд “Улаанбаатар палас”-т чуулж, С.Эрдэнийг намын даргаараа батламжилж, намын дүрмийн төслөө  хэлэлцэж баталлаа. Өчигдрийн хурлын анхаарал татсан гол асуудал С.Эрдэнийн гал тогоог барих хүн хэн бэ гэдэг байв. Түүнчлэн Ерөнхий нарийн бичгийн даргын үүрэг гүйцэтгэгчээр Ц.Тувааныг томиллоо. Хуралдааны төгсгөлд түүнийг томилсон юм.   Ц.Туваан  АН-ын энэ удаагийн их хурлыг зохион байгуулах ажлыг хэсгийг ахалсан,  өмнө нь Үйлдвэр хөдөө аж ахуйн дэд сайдаар ажиллаж байсан, С.Эрдэнийг Хүн амын хөгжил, нийгмийн хамгааллын сайдаар ажиллаж байхад тус яаманд Стратегийн бодлого, төлөвлөлтийн газрын даргаар ажиллаж байсан хүн  тул генсекээр асуудалгүй томилогдоно гэх бор шувуу ийн биеллээ оллоо.

Сануулахад, С.Эрдэнэ Ц.Тувааныг, З.Энхболд Г.Байгалмааг,  Ж.Батзандан О.Магнайг гэхчлэн нэр дэвшүүлж буй тул ойлголцол тохирооны асуудал зайлшгүй гарахаар байсан. Г.Байгалмаагийн хувьд Барилга хот байгуулалтын дэд сайдаар ажиллаж байсан.  З.Энхболдыг УИХ-ын дарга байхад Улсын Их Хурлын даргын Ипотек, барилгын салбар хариуцсан орон тооны бус зөвлөхөөр томилогдон ажиллаж байв. О.Магнайгийн тухайд ШӨХТГ-ын даргаар ажиллахдаа байсхийгээд л хэвлэлийн хурал зарлаж, олон хүнтэй дайн зарлаад амжсан нэгэн. Ямарч байсан эдгээр гурван хүний нэгийг генсекээр тодруулахын тулд нөхдүүд хэлэлцэж шийдвэрлэсэн байж таарна.

С.Эрдэнэд тамга гардуулсан З.Энхболд “Нэгдэж, Шинэчилж чаддаг, Оффшорчид, олигархиудаас салж чадсан гишүүддээ баяр хүргье”  хэмээн хэлнэ лээ. Тэрбээр “Ардчилсан нам түүхэндээ анх удаа Намын даргаа бүх гишүүдээсээ сонголоо. Энэ сонголт нь Монгол Улсын улс төрийн намуудын түүхэнд шинэчлэлийг авч ирлээ. АН-ын даргыг сонгох сонгуульд нэр дэвшиж намын төлөвшил, бэхжилтэд хувь нэмрээ оруулж гишүүдийн итгэлийг сэргээж, хүч хөдөлмөр, цаг хугацаа, сэтгэл зүрхээ зориулсан нэр дэвшигч Н.Алтанхуяг, Ж.Батзандан, Л.Гантөмөр, Д.Эрдэнэбат, С.Эрдэнэ нартаа талархал илэрхийлье… Ардчилсан нам фракци, бүлэглэлийн барьцаанаас өөрийгөө чөлөөлж чадлаа. Бодлого боловсруулах, асуудал шийдвэрлэх, хүний нөөцийн томилгоо хийхээс эхлээд намынхаа хурлыг хийхэд хүртэл фракцитай зөвшилцөж тэдний эрх ашигт нийцүүлэхээс өөр аргагүй байдалд ордог, Тэдний эрх ашигт нийцэхгүй бол асуудлыг шийдвэрлэх ирц хүрэхгүйд хүрдэг байдлаас Ардчилсан нам салж чадлаа.Энэ удаагийн Их хурлын зардлыг фракц бүлэглэл, олигархиуд, оффшорчдоос авахгүйгээр, нийт жирийн гишүүдийн хандиваар бүрдүүлсэн гэдгээ хэлэхэд таатай байна.Ардчилсан нам үүд хаалгаа нээж чадлаа.Намын анхан ба дунд шатны байгууллагыг өөрийн хүрээллийн хэдхэн хүнээр бэхжүүлж, үүд хаалгаа хаадаг тогтолцоо  өнөөдрөөс эхлэн нуран унаж байна. Ардчилсан нам шинэчлэлийг ингэж эхлүүлж, ардчилал шинэчлэлийн  үлгэр дуурайлал болж ирсэн урьдын ололт, гайхамшигтай  туршлагаа дахин давтлаа.” гэсэн юм.

Яахав тэгээд хэлэх бол нэг хэрэг. Харин хийх тэс өөр хэрэг. АН үнэхээр Оффшорчид, олигархиудаас салж чадсан уу гэдгийг С.Эрдэнэ л харуулах биз ээ.

Эх сурвалж: Шуурхай.мн