Хотын дарга асан Э.Бат-Үүл хууль, шударга ёсыг их номлодог. Гэхдээ ярьсан шигээ хийдэг үү гэдэг нь эргэлзээтэй. Түүнийг хотын дарга байхад хятадын компанид газар ашиглах гэрчилгээ олгосон талаар мэдээлсэн билээ. Гэсэн ч Үүл баатар номлосон хэвээрээ л байна. Тэрбээр  “Элбэгдорж, Амаржаргал нар маань “хийдэг хувьсгалаа хийсэн, ахин хувьсгал хийх шаардлагагүй” гэцгээдэг. Үнэндээ бол улс төрийн дискурсийг мэдээд нийгмийн байдлаа уншиж чадах боловсролтой хүмүүсийн хувьд энэ бол том эндүүрэл.

90 оны ардчилсан хувьсгалын зорилт бариандаа хүрч чадалгүй хадуурчихаад байгаа. Одоогийн төр бол ардчилсан төр биш. Төрийн олигархи хэлбэр дүрс тогтчихоод байгаа. Төрийг, Баабарын нотолсончлон люмпэнэлитүүд бүрдүүлж буй. Уг нь люмпэнэлит гэх нь илүү гоёдчихсон нэр юм. Зүй нь люмпэн улстөрчдөөс бүрдсэн гэвэл зохино.

Ийм нийгэмд ёс зүй устаж шоронжсон зүй ёс тогтоно. Шоронжсон зүй ёсны мөн чанар нь улстөрчийг хийсэн хэрэг нь гутаах бус харин Ницшегийн (Friedrich Nietzsche) хэлсэнчлэн улам бүр чимдэг юм. Улстөрч нь хичнээн рецидив маягийн байна төдий чинээ өргөмжлөгдөнө. Шоронжсон зүй ёстой хоёр хэлбэрийн нийгэм байдгийн нэг нь энэ бөлгөө. Өнөөдөр манайд ардчилсан нийгэм бус шоронжсон зүй ёс бүхий бохирдсон нийгэм тогтоод байна гэдгийг дахин давтан хэлье! Хүний бүх эрхэм чанар улс төрийн лангуун дээр байна даа.” хэмээн бичиж суугаа юм.

Тэгвэл Үүл баатраас өөрөөс нь асууя. Таны эрхэм чанар улстөрийн лангуун дээр байгаа юу гэж?

Эх сурвалж: Шуурхай.мн