Эрх зүйт төртэй хамгийн сайн засаглалтай орон байхыг хүсвэл улс орны иргэн бүр  ёс суртахууны хэм хэмжээний талаар тодорхой ойлголттой байх ёстой. Тэрдундаа түмний өмнөөс төрд гарсан, түмний эрхийг өмнөөс нь эдэлж байгаа нөхдүүд ёсзүйн талаар үндсэн ойлголттой байх ёстой. Гэтэл ард түмний итгэлийг хүлээж  хууль тогтоох дээд байгууллагад суусан нөхдүүд чуулганд хүссэн цагтаа л сууж, өөрийнхөө эзгүйд бусдаараа кноп даруулж, алсаас эрх эдэлдэг нь нууц биш болсон зүйл.

Харамсалтай нь УИХ-д суугчид төгөлдөр хуур тоглодог байдал, шинэ парламентад ч яг хэвээрээ байгаа юм.

Гурван жилийн өмнө байх. УИХ-ын гишүүн Р.Амаржаргалыг огцруулах эсэх асуудлыг хэлэлцэн, санал хураалт явуулах үед УИХ-ын гишүүн Ж.Батсуурь хажуугийн эзгүй ширээний кнопыг дарах гэтэл О.Баасанхүү гишүүн “Хөөе боль. Хүний өмнөөс битгий санал өгөх гээд бай” гэж хэлж байсан юм.  Хэрвээ энэ үед нэг хүний зөрүүтэйгээр Р.Амаржаргал гишүүн суудлаасаа буусан бол Ж.Батсуурь гишүүний өөр хүний өмнөөс дарсан тэрхүү кноп АН-ынханд хүндхэн цохилт болох байсан талаар хэвлэлүүд бичиж байсан билээ. Энэ бол бусдын өмнөөс кноп дарах, санал өгөх гэдэг ямар ч үр дагавар дагуулж болохыг илтгэх жишээ л дээ.

Өмнөх парламентын үед нэр бүхий  гишүүд хурууны хээгээр санал өгөх асуудлыг оруулж ирж хэлэлцэх асуудал яригдаж байсан. Гэхдээ ажил хэрэг болсон юм алга.

Уг нь Монгол Улсын Их Хурлын чуулганы хуралдааны дэгийн тухай хуулийн 91дүгээр зүйлийн  91.5 дахь хэсэгт санал хураалт явуулах үед гишүүн санал өгөх эрхээ зөвхөн өөрөө эдлэх бөгөөд энэхүү эрхээ бусдад шилжүүлэх, бусад гишүүний өмнөөс санал өгөхийг хориглоно гэж тодорхой заасан байдаг. Гэвч УИХ-ын гишүүд бусдынхаа өмнөөс санал өгдөг ёсзүйгүй байдал бүр нутагшаад удчихжээ.

Л.Цэвэлийн “Монгол хэлний тайлбар тольд “Ёс зүй гэдэг ойлголтыг “юмны зайлшгүй зүй тогтол жам тавилан” гэж тайлбарласан байдаг юм билээ. Тэгэхээр ёсзүйн хувьд зөрчилтэй алдаа дутагдалтай үйл хийсэн гэдэг бол зохисгүй зүйл хийсэн л гэсэн утга дагуулах юм. УИХ-д иргэдийн өмнө эрхийг нь эдэлж, төрийн жолоог атгах гэж орж ирсэн хүмүүс төгөлдөр хуурчдын дүрд тоглож, заримдаа бусдыг өмнөөсөө төгөлдөр хуурч болгож буй нь дэндүү харамсалтай. Ямартаа л гишүүдийн хурууг нь тайраад кноп дээр нь наавал таарна гэх яриа гарах вэ дээ!

Эх сурвалж: Шуурхай.мн