С.Зориг агсны амь насыг хөнөөсөн хэргээр шүүхээр шийтгэгдээд буй Т.Чимгээгийн ар гэрийнхэн шүүхийн шийдвэрийг хүлээн зөвшөөрөхгүй байгаагаа мэдэгдсээр байгаа. Т.Чимгээгийн дүү Т.Өнөрмөнх medee.mn өгсөн ярилцлагадаа “-Миний эгчийг энэ хэрэгт холбогдуулан шалгаж эхлэхэд ар гэрийнхэн бид маш тайван байсан. Энэ шүүх хурал зарлагдаад, хуралд ороход хүртэл манай өмгөөлөгч гэмгүй хүмүүс юм чинь хөтлөөд л гараад ирнэ гэж байсан. Яагаад гэвэл гэмгүй хүн үнэн дийлнэ гэж бодоод тайван байсан. Гэхдээ шүүх хурлын хувьд гэвэл нээлтэнд л хэвлэлийнхнийг оролцуулсан. Шүүх хурлын дундуур буруутгагдаж байхдаа тэр хүмүүс ямар царайтай байсан. Хурал дуусаад яллуулчихаад ямар төрхтэй байсныг хэн ч хараагүй. Олон нийтэд цацсан хэдхэн дүрснээс л хүмүүс ингэж бодоод байна.” гэжээ. Мөн тэрбээр  Т.Чимгээгийн том охин ээжийгээ хоригдож байхад зуурдаар нас барсан явдлыг энэ хэрэгтэй холбоотой гэж хардаж байгаагаа хэлсэн байна. “За ээжийг нь хэрэг хүлээлгэх гэж охиныг осолд оруулаагүй юм аа гэхэд яагаад ар гэрийнхнийх нь нууцалж байсан хэргийг ээжид нь хэлэх болсон бэ гэдэг их сонин.

Энэ хэргийн талаар ганц хөөцөлдөж явдаг байсан хүн нөхөр нь байсан. Нөхрийг нь өмнө нь энэ хэрэгтэй холбоотой гээд 14 хоног хорьж байсан юм. Тэгээд шүүхийн шийдвэрийн байгууллагаас “Чи энэ хэрэгтэй холбоотой байж магадгүй учир эхнэртэй чинь уулзуулахгүй” гээд уулзах эрхгүй болгосон байсан. Тэгтэл том охин нь нас барсан. Шүүхээс зөвшөөрвөл ээжийг нь ажил явдалд нь оролцуулъя гэж шүүх, прокурор, Хүний эрхийн үндэсний комисс гээд бүгдэд нь хүсэлт гаргасан. Гэтэл бидэнд хаанаас нь ч зөвшөөрөл өгөөгүй. За нэгэнт ээж нь ажил явдалд нь оролцож чадахгүй юм чинь шоронд байгаа эгчийнхээ сэтгэл санааг тайван байлгах, дарамт ирэх вий гэсэн үүднээс хэлэхгүй нууцлахаар шийдсэн. Тэгээд ажил явдал нь маргааш болно гэж байсан чинь тагнуулаас залгаад ганцхан нөхөртэй нь уулзуулж болно гээд уулзахыг хориглосон байсан хүнийхээ нэрийг заасан.” хэмээн ярьсан байна.