УИХ-ын гишүүн Б.Ундармааг Төрийн ордонд согтуу байсан уу гэсэн асуулт хариу нэхэж байна. Өөрийнхөө  суудлыг олохгүй Г.Тэмүүлэн гишүүний суудал руу зүтгэснээ, эргэж нэг юм суудалдаа суусан хойноо үг хэлж байгаа гишүүний ам руу орчих шахам нэг л үл бүтэх харцаар харж суугаа бичлэг нь сошиалаар цацагдаад байгаа юм. Бүр зогсиулаад ч байх шиг. Ямар ч байсан Б.Ундармаа гишүүн бичлэг дээр нэг л жир биш харагдаад байгаа юм. Эрүүл согтуу нь мэдэгдэхгүй байгаа түүнийг хэрэв ууж идчихээд тэгж хаана гишгэж буйгаа, хаана суудгаа  ухаарахгүй яваа бол Төрийн ордны хаалгыг хаагаад гарах хэрэгтэй гэж шууд хэлэх хүмүүс ч байна. Ер нь ёсзүйн л асуудал шүү дээ.

Б.Ундармаа гишүүнийг  намынхаа “угж” тодотгол олон жил дагаж ирсэн.  Аав Р.Батбаярынхаа шанг нь татсан  “Капитал”  банк, “Бишрэлт холдинг”  компанийг дүү охин  Б.Болормаа болоод нөхөр А.Ариунболдынхоо хамтаар авч явж ирсэн тэрбээр өнгөрсөн сонгуулиар  даагаа нэхэж үзээд, гарч ирсэн. Өөрийгөө улстөрд баяртай гэж хэлж чадахгүй хүн гэдэгтэй эвлэрсэн энэ хатагтайтай холбоотой анхаарал татсан мэдээллүүд бий. Тухайлбал,  Энхтайван найрамдлын ордон ба газрын асуудалд холбогдоод тодорхой хугацаа өнгөрснийг нь хэвлэлүүд бичиж ирсэн. Тодруулбал, “Энхтайван найрамдлын нийгэмлэг”-ээр овоглосон Д.Билэгт, Д.Цахилгаан нарын эрхмүүд Энхтайван найрамдлын ордны барилгыг газартай нь Б.Ундармаагийн “Бишрэлт Холдинг”  компанийн охин компани  “Юнико Констракшн”-д тэрбум төгрөгөөр зарсныхаа араас  “Манай нийгэмлэг төрөөс нэг ч төгрөг авдаггүй. Өөрөө өөрийгөө санхүүжүүлдэг. Холбооны үйл ажиллагааг өргөжүүлэхийн тулд өөрийн эзэмшлийн талбайд өргөтгөл барих шийдвэр гаргасан” гэх тайлбарыг хийгээд өнөөдрийг хүрч буй юм байна. Хэрэг дээрээ бол энэ нь өргөтгөл бариад өнгөрөх асуудал биш. Харин хэдхэн хүн бүхэл бүтэн нийгэмлэгийг хувь эрх ашгийнхаа төлөө ашиглаж байгаа явдал гэвэл үнэнд нийцэх аж. Одоогоос 32 жилийн  өмнө баригдсан “ордон”-ы барилга бус, хотын А зэрэглэлийн бүс дэх газар нь өөрөө бизнесийн бүлэглэлүүдийн араа шүлсийг гоожуулж ирсэн.  Тиймдээ ч Энхтайван найрамдлын ордны эзэмшил дэх газрын хэмжээ 2000 оноос өмнө 0.9 га байсан бол, Д.Цахилгаан,  Д.Билэгт нарын удирдлагуудын зөвшөөрөлтэйгээр бусдад шилжиж, өдгөө нөгөө муу хуучны барилга л бууриа сахиад торойж байгаа харагдавч, хэдийнээ эзэн нь өөрчлөгдсөн тул, нурж унах цагаа хүлээгээд байж байгааг хэвлэлээр гарч байгаа мэдээллүүдээс  ойлгоход ядах юмгүй.Тус ордны барилгын өмнөх талбайд  “Жигүүр гранд”-ын бас нэг бүтээгдэхүүн болох  “Сандэй-2” баригдсан бол ордныг газартай нь өөрийн болгосон  “Юнико” констракшны 12 давхар барилга яг хажууд нь байж байна. Барилгын чиглэлээр үйл ажиллагаа явуулдаг “Юнико” констракшн Д.Цахилгаан,  Д.Билэгт нарын удирдлагууд шиг Энхтайван найрамдлын ордны барилгад  20 гаруй түрээслэгч оруулж ирээд сар бүр мөнгө аваад суугаад байхгүй. Илүү олон давхар барилга барьчихаад илүү их мөнгө саахыг хүсч байгаа нь эхнээсээ ойлгомжтой байжээ. Харин нөгөө талд нэгэн цагт 40 гишүүнтэй байсан, өдгөө 20-ийг нь  л авч үлдсэн гэх Энхтайван найрамдлын нийгэмлэг гэх байгууллага гудамжинд гарч таарсан  бололтой юм. Уг нь  энэ ордонд  Монгол, Зөвлөлтийн найрамдалт харилцаа төдийгүй монголын шинжлэх ухаанд ихээхэн хувь нэмрээ оруулж буй Сансар судлалын холбоо,  мөн Чех Словакийн найрамдлын нийгэмлэг гэхчлэн зөвхөн дотооддоо бус гадагшаа чиглэсэн үйл ажиллагаа явуулдаг олон газар бий.   Ер нь бол ордноо зарах үйл ажиллагааг нийгэмлэгийн удирдлагууд нь гишүүдийнхээ дэмжлэгтэйгээр хийсэн гэх мэдээлэл бий. 1 сая ам.доллараар “Юнико”-д зарсан гэх мэдээлэл гарахаас өмнөхөн Энхтайван найрамдлын ордон зарагдах тохироо аль хэдийнээ хийгдсэн байх магадлалтай талаар хэвлэлийнхэн анх бичиж байсан. Тодруулбал, Энхтайван, найрамдлын төлөөх Монголын холбооны удирдах зөвлөлийн хуралдаж тийм шийдвэр гаргасан гэх мэдээлэл байсан.  Ямар ч байсан ордны өмнөх талбайг худалдахад саналаа нэмэрлэсэн хүмүүс нь тус холбооны ерөнхийлөгч, нарийн бичгийн даргаас гадна Найрамдлын нийгэмлэгүүдийн Монголын эвлэлийн дэд тэргүүн, ЭТНМХ-ны дэд ерөнхийлөгч Д.Цогзолмаа, Монгол-Солонгосын найрамдлын нийгэмлэгийн тэргүүн, Ардын уран зохиолч Ш.Сүрэнжав, эрүүл мэндийн сайд асан академич П.Нямдаваа, Монгол-Вьетнамын найрамдлын нийгэмлэгийн тэргүүн, ШУА-ийн Олон улсын судлалын хүрээлэнгийн секторын эрхлэгч, доктор профессор С.Дашзэвэг, Монцамэ агентлагийн захирал Т.Баасансүрэн (тэрээр удирдах зөвлөлд байдаггүй), гэсэн нэр бүхий хүмүүс гэдэг нь тухайн үед яригдаж байсан юм. Тэгэхээр тус нийгэмлэгийн нөхдүүд өөрсдөө төрийн мэдлийн ордныхоо хуучин барилгыг, газартай нь 1 сая ам.долларт зараад, өөрсдөө гадаа гарах замыг сонгосон бололтой. Харин Б.Ундармаагийн “Юнико Констракшн” ХХК  тэднээс газрыг нь авахдаа эргээд хуулийн үүднээс ярьвал ямар асуудал үүсэх бол гэдгийг огтоос тоогоогүй бололтой юм. Уг нь төрийн өмч гэдэг бол түмний мэдлийн юм баймаар.

Эх сурвалж: Шуурхай.мн