С.Зориг агсны амийг хөнөөсөн хэрэгт буруутгагдан ялын дээд хэмжээ сонссон Б.Содномдаржаагийн ар гэрийнхэн шүүхийн шийдвэрийг эсэргүүцэн  энэ сарын 7-ны өдөр Эрдэнэт хотын Соёлын төвийн урд талбайд 12:00 цагаас тайван байдлаар жагсаалт зохион байгуулахаар болсон талаарх мэдээллийг хүргэсэн билээ. Жагсаалын үеэр С.Зоригийн амь насыг хөнөөсөн хэргийн талаар олонд нийтэд дэлгэгдээгүй шинэ баримт дэлгэхээр төлөвлөж байгаа гэх мэдээлэл байгаа юм. Тэдний хувьд шүүхийн шийдвэрийг хэлмэгдүүлэлт гэж үзээд байгаа.

Тэгэхээр шүүхийн шийдвэрийг хэлмэгдүүлэлт гэж үзэж байгаа бол Хүний эрхийн үндэсний комисс гэхчлэн газруудад хандаж, асуудлаа тавьж болох байгаа.  Хүний эрхийн үндэсний комиссын Гомдол, хяналт шалгалтын хэлтсийн дарга Т.Ихтамир хэвлэлд тодруулга өгөхдөө  С.Зориг агсны амь насыг хөнөөсөн этгээдүүдийг шүүх хурал болсноос хойш түүний эхнэр Б.Булган болон шүүхээр ял шийтгүүлсэн хүмүүсийн ар гэрийнхнээс ямар нэгэн гомдол манай байгууллагад одоогоор ирээгүй байна гэжээ. Мөн тэрбээр  “Монгол Улсын иргэн төрийн аль ч байгууллага, албан тушаалтанд өргөдөл, гомдол гаргаж шийдвэрлүүлэх эрхтэй. Үүний дагуу ХЭҮК-т гомдол гаргаж болно. Гэхдээ ХЭҮК-ын хуульд заасны дагуу хэрэг бүртгэлт, мөрдөн байцаалт шүүхийн шатанд байгаа болон шүүхээр хянан шийдвэрлэсэн эрүү, иргэний хэрэг маргаанд оролцох боломжгүй. Анхан шатны шүүхээс тухайн хүнийг гэм буруутайг тогтоож, нэгэнт шийдвэрлэсэн тохиолдолд ямар ч байгууллага, хэн ч шүүхийн шийдвэрт нөлөөлөх боломжгүй. Анхан шатны шүүхийн шийдвэр хууль зүйн үндэслэлгүй гарсан тул тогтоолыг нь хүлээн зөвшөөрөхгүй гэж үзвэл дээд шатны шүүхэд давж заалдах болон хяналтын журмаар гомдол гаргах эрх нь тухайн хэрэгт холбогдсон хүмүүст нээлттэй байдаг.” хэмээн ярьсан байна. Тэгэхээр түүний энэ байр  сууриас үзэхэд нэгэнтээ анхан шатны шүүхийн шийдвэр гарчихсан учраас, С.Зориг агсны амь насыг хөнөөсөн хэргээр ял авсан хүмүүс хэчнээн гомдол гаргаад нэмэргүй гэж харагдаж байгаа юм.

Эх сурвалж: Шуурхай.мн