– Нийслэлийн гэр хорооллын өрх жилд 1 сая тонн нүүрс хэрэглэдэг-

Улаанбаатар хотын агаарын бохирдол дэлхийн дунджаас 5-6 дахин их байгаа гэсэн судалгааг мэргэжилтнүүд гаргаад буй. Агаарыг бохирдуулж буй гол хүчин зүйл нь гэр хорооллын нүүрсний хэрэглээ аж. Тодруулбал, нийслэлийн гэр хорооллын 198 мянган өрх жилд 1 сая тонн нүүрс хэрэглэдэг бөгөөд энэ нь агаарын бохирдлын 80 хувийг бүрдүүлдэг байна.

Харин нийслэлд ашиглаж буй 330 мянга гаруй тээврийн хэрэгсэл 10 хувийг, 3 ДЦС 6 хувийг, хөрснөөс дэгдэж буй тоосжилт 4 хувийг эзэлдэг аж.

Нийслэлийн агаарын бохирдлыг бууруулах ажлын хүрээнд улс, нийслэлийн төсөв болон олон улсын хамтын ажиллагааны байгууллагуудын буцалтгүй тусламж, зээлээр 2011-2015 он хүртэл нийтдээ 132.5 тэрбум төгрөг зарцуулсан гэх мэдээллийг албаныхан өгч буй. Гэвч энэ нь дорвитой үр дүнд хүрэхгүй, жил ирэх тусам агаарын бохирдлын хэмжээ нэмэгдэж, үүнтэй холбоотой хүн амын дунд амьсгалын замын өвчлөл нэмэгдэж байгаа нь түгшүүрийн харанга дэлгэж байна.

-О.Цолмон: Энэ жил 0-1 настай 505 хүүхэд уушгины хатгаагаар амиа алдсан-

Энэ жил 0-1 настай 505 хүүхэд энэ өвчнөөс болж нас барсан байхад өнгөрсөн жил 475 хүүхэд өөд болсон тоо баримтыг олж үзсэн. Харин 1-5 настай 100-200 хүүхэд жил бүр мөн л энэ шалтгаанаас болж амиа алдаж байна.

Энэ сарын 26-нд буюу өнөөдөр Сүхбаатарын талбайд 20000 ээж утааны эсрэг жагсахаар болсон. Ээжүүдийн төлөөлөл болж, энэхүү жагсаалыг зохион байгуулж буй О.Ундрам нэгэн сэтгэл сэртхийлгэм тоо баримтыг дурджээ. Тэрээр “Хувиараа судлаж үзэхэд жилд 40 мянга гаруй хүүхэд ханиад хүрч, хатгаа болдог юм байна. Энэ жил 0-1 настай 505 хүүхэд энэ өвчнөөс болж нас барсан байхад өнгөрсөн жил 475 хүүхэд өөд болсон тоо баримтыг олж үзсэн. Харин 1-5 настай 100-200 хүүхэд жил бүр мөн л энэ шалтгаанаас болж амиа алдаж байна. Үнэхээр агаарын бохирдол хүүхдийн уушгинд дархлаа тогтоохоо больж, хүүхдүүд ханиаднаас, эмнэлгээс, эм эмчилгээнээс салахаа болилоо” хэмээн нэгэн хэвлэлд ярьсан юм.

Тиймээс тэрээр ээжүүдийн төлөөлөл болж, үр хүүхдээ хамгаалахаар агаарын бохирдлын эсрэг дуу хоолойгоо ийн нэгтгэж байгаа аж. Ээжүүд Сүхбаатарын талбайд хар масктай жагсаж, эмнэлгийн шалан дээр хэвтэн эмчлүүлж, нэг утлагын аппаратан дээр зургаан цаг дугаарлаж, хоёр уушиг нь хатгаанд идэгдсэн багачуулынхаа дуу хоолойг төрд хүргэх гэнэ.

-2017 онд агаарын бохирдлыг бууруулахад 4 тэрбум төгрөг төсөвлөжээ-

Өнгөрсөн баасан гарагт Ерөнхий сайд Ж.Эрдэнэбат агаарын бохирдлыг бууруулах асуудлаар мэдээлэл хийсэн. Тэрээр “Цаашид Засгийн газар зуух, түлш шинэчилж агаарын бохирдлыг бууруулах ажил хийхгүй. Цахилгаанаар, хийгээр дулаан үйлдвэрлэдэг технологид шилжинэ. Эхний ээлжинд гэр хорооллын өрхийн шөнийн тарифыг тэглэнэ. Агаарын бохирдлыг бууруулах төсвийн 80 орчим хувь нь шөнийн тарифыг тэглэх, алдагдлыг санхүүжүүлэх зэрэгт зарцуулагдана” гэдгээ илэрхийлсэн юм. Мөн 2017 онд агаарын бохирдлыг бууруулахад 4 тэрбум орчим төгрөг төсөвлөжээ. Ерөнхий сайдын хэлж буйгаар агаарын бохирдлыг бууруулахаар Засгийн газраас хэд хэдэн чиглэл барьж, бодитой арга хэмжээ авч ажиллах гэнэ. Тодруулбал,

Нэгдүгээрт, Гэр хорооллыг орон сууцжуулна. Богино хугацаанд орон сууцжуулахад хүнд. БНХАУ-ын Төрийн зөвлөлийн Ерөнхий сайдын Монголд айлчлах үеэр яригдсан тусламжийн хөрөнгөөр орон сууц барих газрыг чөлөөлөх  ажлыг зохион байгуулна.

Хоёрдугаарт, Өнөөдөр манайд хийн түлш алга. Тиймээс бидэнд байгаа гарц бол цахилгаанаар дулаан үйлдвэрлэх. Агаарын бохирдлыг бууруулах Үндэсний зөвлөлийн хурлаар гэр хорооллын айл өрхийн шөнийн цахилгааны үнийг тэглэх шийдвэр гаргасан. Цахилгаанаар дулаан үйлдвэрлэхэд одоогийн байгаа технологи, тоног төхөөрөмж хангалтгүй. Ийм учраас эрдэмтдэдээ хандсан, хямд өртөгтэй цахилгаанаар дулаан үйлдвэрлээч гэсэн хүсэлт тавьсан. Монгол толгойгоо, нөөц бололцоогоо ашиглая.

Гуравдугаарт, Орон нутагт амьдарч буй иргэдийн амьжиргааны эх үүсвэр алдагдсанаас Улаанбаатарын хүн ам нэмэгдсэн. Тухайлбал, агаарын бохирдлыг бууруулахад 130-140 тэрбум төгрөг зарцуулсан байна. Энэ хөрөнгөөр иргэдээ малжуулж, орон нутагт амьдрах боломж нөхцөлийг бий болгосон бол өнөөдөр олон мянган иргэн орон нутагт амьдрах эх үүсвэртэй, Улаанбаатарт ачаалал нэмэхгүй боломж байсан. Энэ ажлыг төвлөрлийг сааруулах хүрээнд шийдэж болох байсан юм болов уу. Ядуурал, агаарын бохирдлыг бууруулах зэрэг асуудлын хүрээнд иргэдийг малжуулж, орон нутагт амьдрах нөхцөл боломжоор хангах ажлыг хийнэ.

Дөрөвдүгээрт, агаарын бохирдлыг бууруулахад иргэдийн хяналт, тэдний санаачилга чухал гэж Ерөнхий сайд Ж.Эрдэнэбат хэлсэн юм.

-Нийслэлээс “Утаагүй хот-2030” хөтөлбөрийг хэрэгжүүлнэ-

Харин Нийслэлийн Засаг даргын 2016-2020 оны үйл ажиллагааны хөтөлбөрт “Агаарын бохирдлыг бууруулах “Утаагүй хот-2030” төслийг шинэ хэлбэрээр хэрэгжүүлнэ” гэж тусгажээ. Энэ дагуу хөтөлбөр боловсруулан гаргаж, хэрэгжилтийг хангах зайлшгүй шаардлагатай байгааг Нийслэлийн Засаг даргын орлогч Ж.Батбаясгалан хэлсэн юм. Ингэхдээ өмнө нь хэрэгжүүлж байсан бүрэн шаталттай зуух, сайжруулсан түлшний хэрэглээг нэмэгдүүлэх ажлыг зөв системтэй үргэлжлүүлэх. Олон улсын байгууллагын санхүүжилт татаж агаарын бохирдлыг бууруулах шинэ техник технологи нэвтрүүлэх. Шөнийн цагт эрчим хүч хурааж, өдрийн цагаар гэр байшинг дулаанаар хангах төхөөрөмж нэвтрүүлэхээр төлөвлөж байгаа аж.

Түүнчлэн уг хөтөлбөрийн хүрээнд “Нийслэлийн агаарын бохирдлыг бууруулах сан” (НАББС) байгуулж, түүгээр дамжуулан төхөөрөмжөө иргэдэд хөнгөлөлттэй үнээр хүргэх, нийтийн тээвэрт явж буй дизель хөдөлгүүртэй автобусанд тортогжилтыг 80 хүртэл хувиар бууруулах төхөөрөмж суурилуулах зэрэг олон ажил төлөвлөж буйгаа нийслэлийн удирдлагууд хэлж байлаа.

эх сурвалж: http://eagle.mn/