Хөгжлийн банкны асуудлыг чуулганаар хэлэлцэж байгаа талаар мэдээлсэн билээ. Хууль зүй, дотоод хэргийн дэд сайдаар ахлуулсан ажлын хэсгийн шалгалтаар 1.3 их наяд төгрөгөөр хэмжигдэх зөрчлийн асуудал байгааг дуулгасан. Энэ бол бага тоо биш ээ. Гэвч Хөгжлийн банкны асуудлаар улстөрчид хэрүүл тэмцэл хийсэн байдалтай л байцгааж байна. О.Баасанхүү гишүүн өнөөдөр чуулган дээр хэлэхдээ “Өмнөх парламентын үед МАН, МАХН, АН төр барьсан. Тэр дундаа МАН, АН сангийн асуудлаа барьсан. Хөгжлийн банкны нөхцөл байдлыг хараад би гайхаад байна. Монголд зургаахан банк бий. Ам.долларын нийлүүлэлт хийгээд байхад яагаад ханш буурахгүй байгаа юм бэ? Тэр ам.долларууд хаана байна вэ? Ам.доллараа худалдаж аваад гадагш гаргачихсан юм уу? Хоёрдугаарт, өр төлбөрүүдээ арванхоёрдугаар сарын 31-нээр хааж байгаа юм бол өр төлбөрүүдийг нь хэн төлөх юм бэ? Өр барагдуулах нэгж гэж зохион байгуулалттай ажлын хэсэг байгуулах юм уу? Цаашид өр төлбөрүүд төлөгдөх юм уу, үгүй юу? Хөгжлийн банкин дээр ард түмний нэрийн бариад хууль зөрчсөн зүйл байгаа бол өмнөх Сангийн сайд нар хариуцлага үүрэх ёстой. Миний сонссоноор зээлийн 60 хувийг МАН авсан гэж байсан. Энэ зээлийг үнэхээр ардын намынхан авсан юм биш үү? Сонгуулийн сурталчилгааны үед хоёр намынхан онгоцоор нисэж сурталчилгаа хийж байсан. Энэ их мөнгө хаанаас гарсан юм бэ?” хэмээн хэлж байлаа.

Эх сурвалж: Шуурхай.мн