Монголын байгаль орчны төлөөх хуульчдын холбоо (МБОТХХ)-нд Засгийн газрын хэрэг эрхлэх газар (ЗГХЭГ)- ын дарга асан С.Баярцогт Швейцарийн “Кредит Суис” банканд 9.2 сая ам.доллар хадгалуулсан гэсэн баримт иржээ.

Энэ талаар өнөөдөр МБОТХХ-ноос мэдээлэл хийлээ. 2013 онд С.Баярцогт Швейцарийн “Кредит Суис” банканд хууль бусаар олсон 1 сая ам.доллар хадгалуулсан тухай мэдээлэл олон нийтэд цацагдсан. Тухайн үед МБОТХХ-ноос уг асуудлыг шалгуулахаар дотоодын хууль, хяналтын байгууллагад хандсан ч “УИХ-ын Тамгын газар С.Баярцогтод ёс зүйн хариуцлага тооцсон тул дахин хариуцлага хүлээлгэх боломжгүй” гэсэн хариу өгчээ. Тиймээс тус байгууллага өнгөрсөн онд Швейцарийн прокурорын байгууллагад хандсан бөгөөд энэ оны зургадугаар сарын 27-ноос С.Баярцогтыг мөнгө угаасан хэргээр эрүүгийн хэрэг үүсгэн шалгаж эхэлсэн хэмээн МБОТХХ-ны тэргүүн, Ш.Жаргалсайхан хэллээ.

МБОТХХ-ны Дэд тэргүүн Ц.Туяацэцэг, “Швейцарийн прокурорын байгууллагаас “Кредит Суис” банкан дахь С.Баярцогтын дансанд шалгалт хийсэн. Шалгалтаар “Кредит Суис” банк 2009 оны 10 сарын 27-нд С.Баярцогтод “Таны хадгаламжийн дансанд 9.2 сая ам.доллар орсон. Швейцарийн банкны хуулийн дагуу бид өөрийн үйлчлүүлэгчийн бизнесийн үйл ажиллагааны талаар мэдээлэл авах ёстой.

Тиймээс та энэхүү 9.2 сая ам.долларын мэдүүлэг, гэрээ, хэлэлцээрийн хуулбар, нэхэмжлэл зэргийг бидэнд ирүүлнэ үү. Таны мэдээллийн нууцыг бид хадгалах болно” гэсэн албан бичиг илгээсэн нь илэрсэн. 2009 оны 10 сарын 06-нд Оюутолгойн гэрээг үзэглэсэн. Тиймээс энэ мөнгө Оюутолгойн гэрээтэй холбоотой байх магадлалтай гэж үзэж байна. 9.2 сая ам.доллар одоог хүртэл С.Баярцогтын дансанд байгаа эсэхийг шалгаж байгаа тул дэлгэрэнгүй мэдээлэл өгөх боломжгүй. Шалгалт дуусч, байцаан шийтгэх ажиллагаа явагдсаны дараа бид дэлгэрэнгүй мэдээлэл өгөх болно” хэмээв.

Швейцарийн шүүхээс С.Баярцогтын “Кредит Суис” банкан дахь данс хууль бус хэмээн үзсэн тохиолдол бүх мөнгийг Монгол Улсын Засгийн газарт шилжүүлэх юм.

Мөн тус холбооноос УИХ-аар хэлэлцэж буй Нийтийн албанд нийтийн болон хувийн ашиг сонирхлыг зохицуулах, ашиг сонирхлын зөрчлөөс урьдчилан сэргийлэх тухай хуульд нэмэлт өөрчлөлт оруулах тухай буюу Оффшор дансны тухай хуулийн төслийг дахин боловруулахыг шаардлаа.

Өөрөөр хэлбэл хуулийн төсөлд төрийн өндөр дээд албан тушаалтны гэр бүлийн хүн, үр хүүхэд, хамаатан садан нь оффшор бүсэд хадгаламжтай байхыг зөшөөрөхөөр заасан нь буруу гэдгийг МБОТХХ-ны удирдлагууд онцлов. Өөрөөр хэлбэл оффшор бүсэд хадгаламжтай албан тушаалтан мөнгөө эхнэр, хүүхдийнхээ нэр рүү шилжүүлэх магадлалтай тул энэ хууль үр дүнгээ өгөхгүй хэмээн үзэж байгаа аж.