Төр, нийгмийн нэрт зүтгэлтэн С. Зориг агсны амь насыг хөнөөсөн хэргийн шүүх хурал  хорих 461-р ангид эхэлсэн ч,  шүүх бүрэлдэхүүн өмгөөлөгчдийн хүсэлтээр шүүх хурлыг долоо хоногийн хугацаатай хойшлуулах шийдвэр гаргав. Өнөөдөр шүүх хурал эхлэхэд  шүүгдэгч Ц.Амгаланбаатар, Б.Содномдаржаа, Т.Чимгээ нар оролцсон юм. Хуралд   С.Зориг агсны гэргий Б.Булган ирээгүй байсан юм.

Ямартай ч өнөөдрийн тухайд шүүх хурлыг даргалагч М.Алдар шүүгдэгчдийн холбогдсон хэргийн зүйл ангийг уншиж танилцуулснаар шүүх хурал эхэлж, улмаар  хаалттай үргэлжилсэн юм. Хэргийг улсын нууцтай холбоотой гэж үзэж байгаа тул шүүгдэгчдийн ар гэрийнхнийг ч мөн хуралд оролцуулах боломжгүй гэж байв.

С.Зориг агсны амийг  хөнөөсөн хэрэг ямар ч байсан Монголын шүүхийн хаалгыг татлаа. Ц.Амгаланбаатар, Т.Чимгээ, Б.Содномдаржаа нарыг хариуцагчаар татаж Эрүүгийн хуулийн тусгай ангийн 91.2.1, 91.2.4, 91.2.6, 91.2.10, 91.2.11, 91.2.12, 91.2.13, 91.2.16  гэсэн найман зүйл ангиар буруутгаж байгаа уг хэрэг долоо хоногийн дараа буюу энэ ондоо багтаж, шийдвэрлэгдэх үү гэдэг асуулт хариулт нэхэж байна.

Эдгээр хүмүүсийг хүнийг шунахайн сэдлээр, захиалгаар, өөр гэмт хэргийг нуун далдлах буюу хялбарчлах зорилгоор, хүнийг санаатай алах гэмт хэргийг давтан үйлдсэн, бүлэглэсэн, зохион байгуулалттай, онц харгис болон нийтэд аюултай аргаар, хоёр ба түүнээс олон хүний амь насанд хүрсэн тохиолдолд гэж зүйлчлээд байгаа юм. Түүнчлэн С.Зориг агсны амийг хөнөөсөн хэрэг улстөрийн аллага биш гэгдэж байгаа.  Ямартай ч тэгээд шүүх эцэслэн шийдэх учиртай юм.

Эх сурвалж: Шуурхай.мн