Улсаа хөгжүүлэх чин хүсэлтэй, хамт олноо манлайлагч, дэлхийн ертөнцийн боловсролын төвшинтэй хөл нийлүүлэгч 40 хүртэлх насны залуу хүнийг “Шилдэг залуу улстөрч”-өөр шалгаруулах бүх нийтийн санал асуулга олон нийтийн дунд явагдаад уламжлал болж тогтсон. Ард иргэдээ шулж мөлжиж биш шударгаар ажилласан улсынхаа хөгжилд бодитоор оролцож яваа хүнд тус нэрийдэл дэндүү зохих атал хутганы ирэн дээр дэнжигнэж буй улсынхаа эдийн засаг хөрөнгө мөнгөөр даажигнаж буй том гүзээтнүүд үүнд шунах нь элбэг. Тэгвэл УИХ-ын гишүүн Т.Аюурсайхан өөрийн нэрийг уг жагсаалтаас хасч өгнө үү хэмээн мэдэгдсэн нь олон хүний сонирхлыг татав. -Тэрээр “Улс нь ядуу байхад улс төрч нь шилдэг байна гэж юу байх вэ! Намайг энэ жагсаалтаасаа хасна уу, улстөрч.мн сайт аа!
Харин үүний оронд улсаа ядууруулсан шилдэг хулгайчдыг олон нийтийн санал асуулгаар шалгаруулъя?” хэмээн бичсэн юм. Гадаадын их дээд сургуулиас эхлээд өөрийнхөө улсын боловсролын системээр хүртэл өөрийгөө боловсруулж улс төрийн салбарт олон жил хүч үзэж яваа түүний гаргасан шударга шийдвэр нь сайшаалтай ч өөр бусад хэд нь эрх мэдэл алдар хүндээсээ татгалзаж чадах вэ гэдэг нь бараг ойлгомжтой.

Эрх барьж байх хугацаандаа эх орноо их хэмжээний өрөнд оруулж, үүсээд буй хямралын ангалруу түлхсэн АН-ынхан шилдэгт багтах уу энэ бүх хар нүхнээс гарах ухаанаа хараахан олоогүй яваа МАН-ынхан энэ жагсаалтанд их байрыг эзлэх үү гэдгийг олон түмэн л шийдэх үлдэж дээ..

Эх сурвалж: Шуурхай.мн