“Хар сарнай” хамтлагийн ахлагч С.Амармандах бусдад зодуулж, биеийн байдал нь сайнгүй байгаа гэх мэдээлэл гараад байсан. Тэгвэл болсон хэрэг явдлын талаар С.Амармандахын аав С.Сүхбаатар, “Хар сарнай” хамтлагийн дуучин Маадай, “Сүнс” хамтлагийн дуучин Б.Лхагвасүрэн, өмгөөлөгч Г.Батхуяг нар  өнөөдөр хэвлэлийнхэнд мэдээлэл өгч байна. Тэд  мэдээлэл хийх болсон  гол учир нь хэвлэлүүд болсон явдлын талаар буруу мэдээлэл тарааж, олон нийтийн сүлжээнд Орос, Монголын харилцааны асуудлыг сөхөж, олон нийтийг турхирсан, буруу ойлголт өгсөн зүйлсийг тарааж байгаа тул,  холбогдох байгууллага нь асуудлыг  шалгаж байгаа тул монголчууд маань хүлээцтэй хандаасай гэдгийг хэлэх гэснийх гэж байлаа. Б.Лхагвасүрэн болсон явдлын талаарх мэдээллийг өгсөн юм. Тэрбээр “Хар сарнай” хамтлагийн дуучин С.Амармандах хүнд зодуулж, бэртсэн энэ үйл явдал арваннэгдүгээр сарын 22-нд болсон. Энэ өдөр нийслэлийн тодорхой удирдлагуудын санаачилсан “Аз жаргалтай Улаанбатар” арга хэмжээ Хан-Уул дүүргийн “ONE EVENT” концерт зааланд болж, дуучин С.Амармандах түүнд “Би Монгол”, “Аз жаргал хүсье”, “Үзэсгэлэнт монгол бүсгүй” гэсэн гурван дуугаа дуулж оролцсон байгаа юм. Энэ үеэрээ дуучин үндэсний хас тэмдэгтэй хувцас өмссөн байсан. С.Амармандах дуулж дууссаныхаа дараа хувцсаа сольж, гэр рүүгээ явахаар концертын танхимын коридорт явж байх үед нь цагаан цамцтай, сахалтай хүн түүнийг барьж авч, хүнд метал зүйлээр цохисон. Баарны зөөгч залуу түүнийг очиж болиулсан. Болсон явдлыг харсан гэрч байгаа. Хэрэг үйлдсэн хүн нь ч тодорхой, ганц хүн байгаа. Тэр хүн цагдаагийн байгууллагад очиж мэдүүлэг өгсөн.С.Амармандах эмнэлэгт ухаангүй хүргэгдэж, хэд хоног ухаангүй байсан. Өнөөдрийн байдлаар ухаан орж, хүн танихтайгаа болсон ч биеийн байдал маш хүнд байгаа” гэсэн юм. Харин С.Амармандахын аав С.Сүхбаатар хэлэхдээ “Надад маш хүнд байна. Би  энэ арваад хоногт хүүгээ танихгүйд хүрлээ. Та бүхний мэддэг С.Амармандах биш, царай зүс нь танигдахын аргагүй болсон. Дипломат ёсыг би мэднэ. Тэр танхай этгээд өөрийнхөө хувийн үзэл бодлоор далайлгаж хүүг минь хохироосон. Нүүрэндээ хүнд бэртсэн. Оёдлоо авахуулж байгаа. Цаанаа тархиндаа нөж хурчихсан байна. Надад үнэхээр хэлэх үг олдохгүй байна” гэж байлаа.

Эх сурвалж: Шуурхай.мн