Нийслэлийн мэргэжлийн хяналтын газрын Эрүүл мэнд, боловсрол, соёл, хяналтын хэлтсээс нийслэлд эмнэлгийн үйл ажиллагаа явуулж буй аж ахуйн нэгжүүдэд шалгалт хийх үеэр нэгэн ноцтой зөрчил илрээд байна. Тодруулбал,  шарх угаах, гадуур хэрэглэх заалттай шингэн буюу перкисийг өвчтөний судсаар хийж байсан ноцтой зөрчил  юм. Эмнэлэгт бага эмч мэргэжилтэй П.Ц гэгч нь эмнэлгийн тусламж үйлчилгээ явуулах, мэргэжлийн үйл ажиллагаа эрхлэх тусгай зөвшөөрөлгүйгээр хувийн эмнэлэг ажиллуулж байжээ.Баянгол дүүргийн 3-р хороонд байрлах “Грейс” төвд үйл ажиллагаа явуулж байсан байна. Үйл ажиллагааны хувьд бариа засал, соронзон резонанс аппаратын оношлогоо хийж иргэдэд эмнэлгийн тусламж үйлчилгээ үзүүлж байсан байна. Гол нь  устөрөгчийн 3 хувийн 1 мл уусмалыг хордлого тайлах, шингэн сэлбэх зориулалттай 0.9 хувийн 250 мл натрийн хлоридын уусмалтай холиод, хүний биед венийн судсаар хийж байсан нь илэрчээ. Мэргэжлийн хяналтын газраас уг  эмчилгээ нь батлагдсан стандарт байхгүй,  хүний эрүүл мэндэд сөргөөр нөлөөлж болзошгүйг сэрэмжлүүлж байгаа юм. Тэгэхээр бага эмч П.Ц нь Эрүүл мэндийн тухай хуулийг зөрчиж,  хүмүүсийн бие, эрүүл мэндийг эмчлэх бус эрсдэлд оруулж байна гэж үзсэн тул улсын ахлах байцаагч акт үйлдэж, эмнэлгийн үйл ажиллагааг зогсоожээ.

Ер нь анагаах ухааны салбарт шарх цэвэрлэх бодисыг судсаар хийдэг эмчилгээ байдаггүй гэдгийг мэргэжилтнүүд хэлж байгаа юм.  Их эмч С.Эрдэнэсүрэн  medee.mn сайтад тодруулга өгөхдөө “Устөрөгчийн хэт исэл буюу перкисийг идээт үрэвсэл, хоолойны ангина, хавтгай хэлбэрийн улаан үлхий зэргийг эмчлэхэд гадуур хэрэглэх заалттай байдаг. Мөн амны эвгүй үнэр дарах, цус тогтоох зэрэгт ам зайлж хэрэглэж болдог. Гэхдээ ам хоолойг зайлах, арчихад буцалсан усаар 10 дахин шингэлж хэрэглэдэг. Хэрвээ ингэж шингэлэхгүй бол ам салстыг түлэх, хөхлөг гипертрофи томрох гэх мэт гаж нөлөө үзүүлдэг. Харин энэ уусмалыг венийн судсаар хийснээр тухайн хүнийхээ биеийн байдлаас шалтгаалж хүнд хэлбэрийн хордлогод орох, цаашлаад амь насаа алдаж ч болзошгүй. Хүмүүс нэг зүйлийг ойлгох хэрэгтэй. Энэ уусмалыг судсаар хийх заалт байхгүй. Анагаахын шинжлэх ухаанд ийм зүйл байж болохгүй” хэмээн хэлсэн байна.

Тэгэхээр эмнэлгийн үйл ажиллагааг зөвшөөрөлгүй явуулахын сацуу анагаах ухаанд байхгүй аргаар эмчилгээ явуулж байгаа эмнэлгээр үйлчлүүлж перкисийн уусмалыг гурван удаа хийлгэсэн иргэн Б мөн тодруулга өгчээ. Тэрбээр  “Хүмүүс перкисээр эмчилдэг, их сайн гээд эмчийг яриад байсан. Тэрнээс эмч надад ийм тийм гэж ярьж байгаагүй юм байна. Би ч эмч хүнд итгээд шингэний найрлага энэ тэрийг асууж байгаагүй. Нарийн мэргэжлийн эмчид хандаж үзээгүй л байна. Гэхдээ миний бие энэ эмнэлгээр үйлчлүүлээд ямар ч байсан дээрдэж сайжирсан зүйл байхгүй. Харин ч бүр үе мөч өвдөгөөр өвдөх болсон. Гэхдээ энэ нь перкисээс болсон гэж хэлж мэдэхгүй юм. Гэхдээ анагаахын хүмүүс өөрсдөө энэ перкисийг хүний судсаар хийнэ гэж байж болохгүй гэж ярилцаж байна лээ.” хэмээн хэлсэн байна.

Хүмүүс тэр эмнэлэн болоод эмчийг перкисээр эмчилдэг сайн эмч гэхээр очсон гэж энэ хүн ярьж. Тэгэхээр өнгөрсөн хугацаанд хэчнээн олон хүн перкисээр тариулж, эрүүл мэнддээ илүү хохирол үзээд явж байгаа вэ гэдэг нь анхаарал татсан асуудал юм.

Эх сурвалж: Шуурхай.мн