Ес эхэлж хүйтний эрч чангарч байгаа энэ үед түгжрэл хийгээд халтиргаа гулгаанаас үүдэлтэй иргэдийн эрүүл мэндийн асуудал нэн тэргүүнд яригдаж байна. Энд тэндгүй мөстсөн зам, явган хүний гарц гэх мэт өнөөдөр иргэдийн эрүүл амьд явах баталгаа тун бага байгаа юм. Дэмий л сошиалаар хошигноцгоож бараг л энэ байдалтайгаа эвлэрч үзэмжтэй хийгээд бэртэлгүй унаж сурцгаая хэмээн нийслэлчүүд шинэхэн уриагаа мөрдөөд амьдарцгааж байгаа гэхэд уншигчид санал нийлэх биз. УИХ-ын гишүүн Б.Энх-Амгалан гэх эрхэм хүртэл энэ бүх асуудлууд иргэдийг гараа хумиад дэмий сууж байгаагаас үүдэлтэй гэж ард түмэндээ бурууг тохож яриа өгч сууна. Тэгвэл энэ яриа нь хуучраачгүй байхад иргэд сайн дураараа нийслэлийнхээ цасыг цэвэрлэж өөрийнхөө болоод өрөөлийн эрүүл мэндийг хамгаалж хүйтэнд хөрж хөлдүү мөс тогшиж зогсоно. Тухайлбал аравдугаар хорооллоос таван шар хүртэлх замыг ганцаараа цэвэрлэж байгаа залуугийн тухай бичлэг цахим хуудсаар шуугьж эхлэв. Энэ мэтчилэн иргэд олны нүдэнд ил бас далд хэлбэрээр цас мөтэй тэмцэж байгаа нь сайшаалтай ч дээдэх нь суудлаа олохгүй бол доодох нь гүйдлээ олохгүй гэдэгчлэн хэдий болтол хувь хүмүүс замын цагдаа, хот тохижилтын ажилтнуудаа хуйгаар нь хаман халшрам хүйтэнд хавчиганаж зогсох вэ дээд удирдлагуудаа!

Эх сурвалж:Шуурхай.мн