Өвлийн Улаанбаатарт утаанаас гадна халтиргаа гулгаа гэж тулгамдсан асуудал үүсээд иргэд үнэхээр их бухимдалтай байгаа. Өглөө эрт ажилдаа гарсан хүмүүс хоёр цагийн дараа гэхэд замдаа явж байхаар, яаж ч бухимдалгүй байх билээ. За тэгээд явган нь утаагаар амьсгалж, хөлдөж үхэх гэж явахын сацуу үргэлж уран гимнастикийн хөдөлгөөн хийж байгаа аятай тэшиж үхчих гээд амаргүй байгаа энэ үед УИХ-ын гиүүн Б.Энх-Амгалан гэж нөхөр иргэдийг даапаалаад, доромжлоод сууж байх юм. Эрхэм гишүүний хувьд Улаанбаатарт замын хөдөлгөөнд оролцох үнэнхүү хүндрэлтэй байгаагийн гол буруутан нь юу ч хийхгүй гараа хумхиад сууж байгаа иргэд л бололтой юм.

Түмнийг төрд төлөөлөх үүрэгтэй төрийн түшээ тэрбээр ямар ч байсан Улаанбаатарчуудыг гараа хумхиад сууж байгаа гэж доромжлов. За мөн зун жолооч болоод өвөл машин барьж үзээгүй, бас болоогүй халзан дугуйтай явж байгаа нөхдүүдээс болоод л зам тээврийн хөдөлгөөн тэгж их хүндрээд байгаа юм байх. Уучлаарай, тэгвэл Б.Энх-Амгалан гэж гишүүнээс асууя. Өнгөрсөн зун хэдэн хүн шинээр жолооч болсноос хэд нь өнөөдөр замын хөдөлгөөнд оролцож байгаа талаар статистик тоо таны өмнө байгаа юм уу. Байгаа бол тэрийгээ гаргаад ир. Баримттай ярь. Тэгж чадахгүй байж иргэд рүү дайрахаа боль гэж хэлэх байна. Түгжрэл үүсгэж байгаа гол буруутан нь иргэд биш, харин түмний татварын мөнгөөр нийслэлчүүдийн өмнө тулгамдаад байгаа асуудлуудыг шийдэх учиртай нөхдүүд шүү дээ. Гэхдээ иргэд иргэнийхээ үүргийг биелүүлж цас мөс цэвэрлэж байгаатай зөндөө л таарч байна. Харин Б.Энх-Амгалан гишүүн та амаараа бусдыг буруутгахаас биш 1 сантиметр цас цэвэрлэсэн юм уу?

Төрийн түшээ хүн ингэж иргэдээ чичлэхийг эхэнд тавьж болохгүй ээ. Эхлээд өөрсдийгөө хар. Эрхэм гишүүн таны намтраас харж байхад 1995-1999 онд  Улсын аюулгүй байдлыг хамгаалах ерөнхий газрын ажилтан хийж байсан юм билээ. Тэгвэл танд иргэдийнхээ аюулгүй байдлыг хэрхэн яаж хамгаалах вэ гэдэг дээр баримтлах төрийн түшээ хүний үзэл бодол гэж байна уу?

Эх сурвалж: Шуурхай.мн