Рио-2016 олимпийн хүрэл медальт Г.Отгонцэцэг өчигдөр Казахстан улсын Спортын гавьяат тамирчин цол хүртжээ.

Шагналыг Кызылорд хотод болж буй Казахстаны жүдо бөхийн улсын аварга шалгаруулах тэмцээний хоёр дахь өдөр /Тэмцээн 16-19-нд үргэлжилнэ/ тус улсын жүдо бөхийн холбооны дэд ерөнхийлөгч Мурат гардуулсан байна.

Г.Отгонцэцэг жүдо бөхийн төрөлд Казахстаны Гавьяат тамирчин цол хүртэж байгаа гурав дахь жүдоч ажээ.

Г.Отгонцэцэгийн хувьд 2015 оны нэгдүгээр сард Казахстан улсын жүдо бөхийн холбоотой гэрээ байгуулан, 2016 оны олимпод тус улсын нэрийн өмнөөс барилдаж, хүрэл медаль хүртсэн юм. Мөн энэ хугацаанд Казахстын улсын аварга шалгаруулах тэмцээнд хоёр жил дараалан түрүүлж, хошой аварга болоод байна.

2016 онд олимпийн наадам, Азийн аварга шалгаруулах тэмцээн, Их дуулга гээд олон улсын 10 тэмцээнд зодоглож, бүгдээс нь медаль хүртсэн /5 алт, 2 мөнгө, 3 хүрэл/ Г.Отгонцэцэгийг Олон улсын жүдо бөхийн холбоо энэ оны шилдэг эмэгтэй жүдочоор нэрлэсэн.

Шавьтайгаа хамт Казахстанд ажиллаж, амьдарч буй түүний багш Д.Энхбаатар саяхан Казахстаны жүдо бөхийн эмэгтэйчүүдийн шигшээ багийн ахлах дасгалжуулагчаар томилогдсон. Г.Отгонцэцэгийн дараагийн тэмцээн арванхоёрдугаар сарын 2-4-нд Японд болох “Их дуулга” байх юм.