Пакистаны эрх баригчид 1985 онд гэрэл зураг нь Америкийн “National Geographic” сэтгүүлийн нүүрэнд нийтлэгдэж байсан Афган эмэгтэйг нутаг буцаасан талаар “CNN” агентлаг мэдээллээ.  Охины зургийг 1984 онд ЗХУ Афганистанд дайн хийж байх үед баруун хойд Пакистан дахь дүрвэгсдийн хуаранд гэрэл зурагчин Стив Маккарри авч байжээ.

“Ногоон нүдтэй охин” хэмээн олон улсад алдаршсан Шарбат Гулаг өнгөрсөн сарын 26-ны өдөр хуурамч бичиг баримт бүрдүүлсэн хэмээн саатуулагдсан билээ. Түүнийг өчигдөр  албаныхан “Торхам” боомтоор Афганистаны талд хүлээлгэн өгчээ. Түүнийг Пешавар мужид дөрвөн хүүхдийн хамт хуурамч бичиг баримтаар амьдарч байсныг хуулийнхан илрүүлжээ.

Афганистаны Ерөнхийлөгч Ашраф Гани өмнө нь Шарбат Гула эх орондоо ирвэл Кабул хотноо байр бэлэглэх болно хэмээн амласан билээ.