Монголбанкны Ерөнхийлөгч Н.Баяртсайхан валютын ханшийг богино хугацаанд бууруулна гэж хэлж чадахгүй хэмээн том дуугарчээ. Тэгэхээр төв банкны удирдлагыг гартаа авангуутаа бодлогын хүүг өсгөж, ханштай тэмцсэн тэмцэлдээ тэр бууж өгчээ, нэг талаас. Тэрбээр “гадаадын шууд хөрөнгө оруулалтыг татах ёстой. Гадны шууд хөрөнгө оруулалтад саад болж байгаа зүйлсийг арилгах ёстой. Хоёрдугаарт, экспортын орлогоо нэмэгдүүлж байж бүтээгдэхүүнээ гадаадад экспортод гаргаж байж валюттай болно. Тийм учраас аж ахуйн нэгжүүд экспортоо нэмэгдүүлэх чиглэлээр илүү их ажиллах ёстой гэдгийг ярилцлаа. Гуравт, бидэнд хямд валют хэрэгтэй байна. Урт хугацаатай, бага хүүтэй мөнгө олох чиглэлээр Засгийн газар, Монголбанк санаачлага гаргаж ажиллах хэрэгтэй байна. Бид ханшийг захиргаадалтын аргаар хатуу барих боломжгүй. Тэгэхээр ханшаа тогтворжуулах чиглэлээр бодлого барьж ажиллана.Богино хугацаанд валютын ханшийг бууруулна гэж амалж чадахгүй. Эдийн засгийн нөхцөл байдал амаргүй, хэцүү байна. Өнгөрсөн жилүүдэд их хэмжээний монгол төгрөг хэвлэж гаргасан. Тэр нь өнөөдөр зах зээл дээр чөлөөтэй байж байна. Тэр мөнгө хаашаа л бол хаашаа урсахад бэлэн. Нэг бол валют болж урсана, нэг бол Засгийн газрын үнэт цаас болж урсана, нэг бол Төвбанкны үнэт цаас болж урсана. Нөхцөл байдал ийм байгааг ард түмэн ойлгох байх.” хэмээн ярьсан байна.

Эх сурвалж: Шуурхай.мн