Их эзэн хааны мэндэлсэн өдөр буюу “Монгол бахархлын өдөр”-өөр эх орныхоо тусгаар тогтнол, үндэсний эв нэгдлийг бэхжүүлэх, түүх соёлынхоо уламжлалыг судалж, хойч үедээ өвлүүлэх, тэдгээрийг дэлхий дахинд сурталчлан таниулах үйлсэд үнэтэй хувь нэмэр оруулсан нэг хүнийг Чингис хаан одонгоо шагнадаг билээ. Тэгвэл энэ жилийн Чингис хаан одонгийн эзнээр П.И.Чайковскийн нэрэмжит олон улсын мэргэжлийн дуурийн дуулаачдын XV уралдааны I байр, Гран-при шагналт, Монгол Улсын Гавьяат жүжигчин, Цагдаагийн “Сүлд” чуулга, Буриадын Дуурь, бүжгийн эрдмийн театр, Маринский театрын гоцлол дуучин Ганбаатарын Ариунбаатар тодорлоо.

Тэрбээр дөрвөн жилийн өмнө МУГЖ болсныхоо дараахан “- МУГЖ цолыг аваад гарч ирчихээд “Би юу хийсэндээ авчихав аа” гэж айж байсан. Хамгийн анх гавьяат гэж зарлуулах надад үнэхээр хүнд байсан. Намайг хийж бүтээгээсэй гэж өгсөн байх гэж боддог. Урамшуулсан байх.” хэмээн ярьж байсныг эргэн дурсахад таатай байна. Тэр үед Г.Ариунбаатар спортоор жишиж яривал ДАШТ-тэй эн зэрэгцэх М.Глинкийн уралдаанд эрэгтэй нэгдүгээр байрын шагналыг бардамхан аваад ирсэн байсан юм л даа. Түүний дуулахыг сонссон хүмүүс Браво, Большой Монгол гэж орилоод л, тайзны ард орчихсон байхад нь буцаж гаргаж ёслуулаад л үнэхээр кайфтай байсныг тэр өөрөө хэлж байсан юм.

Тэгвэл тэр гурван жилийн дараа илүү дээшээ цойлсон кайфыг Монголчууддаа мэдрүүлсэн.Сонгодог урлагийн олимп гэгддэг П.И.Чайковскийн нэрэмжит олон улсын хөгжмийн наадмын тэргүүн байраас гадна “Гран При” шагналыг тэр бахархалтайгаар гардаж авсан билээ. 39 орны 500 гаруй авьяастан оролцсон “олимп”-оос Монгол залуу ийн тодорч, авьяас билгээ батламжуулсан.  Түүнийг дуулж дуусахад ОХУ-ын Ерөнхийлөгч В.Путин амандаа браво хэмээн хэлж байсан нь хэн хүний нүдэнд туссан юм. Эрхэмсэг ноён Кобзон Г.Ариунбаатарын авьяасыг бахдан хэсэгтээ алмайрахыг бид харсан.

Тэгвэл тэр энэ жил Чингис хаан одонгийн эзэн боллоо.

Эх сурвалж: Шуурхай.мн