Нэгэнтээ иргэн бүр шууд утгаараа төрийн эрхийг барьж чадахгүй тул төлөөллийн ардчиллын зарчимаар сонголтоо хийж өөрсдийнхөө төлөөлөл болсон хүмүүст эрх мэдэл олгох нь хамгийн боломжит  арга зам гэдгийг дэлхийн улс орнууд хүлээн зөвшөөрөөд удаан хугацаа өнгөрсөн. Харин манай тухайд ардчилсан тогтолцоогоор замнаад 26 жил болж байна. Өнгөрсөн хугацаанд бид сонголтоо хийж, төр түмний төлөө ажиллах үүргийг нөхдүүдэд оноож ирсэн.

Тэгвэл өнөөдөр бидний хувьд сонгох эрхээ эдлэх өдөр юм.  УИХ-ын ч бай, Орон нутгийн ч бай аль ч сонгуульд өндөр ач холбогдол өгөх нь иргэдийн үүрэг. Тэрдундаа орон нутгийн сонгууль гэдэг бол иргэддээ хамгийн ойр ажиллах хүмүүсийг сонгох сонгууль гэдэг утгаараа идэвхтэй оролцох ёстой юм. Ер нь бол сонгуулийн дүнгээр байгуулагдсан орон нутгийн удирдлагууд ихээхэн эрх мэдэлтэй болж байгаа. Тэр утгаараа иргэдийнхээ төлөө, сум орон нутгийнхаа төлөө цохилох зүрхтэй хүмүүсийг сонгох шаардлага хаа хаанаа бий гэж болно.

Орон нутгийн сонгуульд саналаа өгөх нь иргэн таны үүрэг гэдгийг, эргээд төр засагтай хариуцлага ярихын тулд үүргээ биелүүлэх ёстой гэдгийг засгийн тэргүүн өнөөдөр хэлж байна. Ер нь бол бусад эрхмүүд ч хэлдэг. Засгийн газар, аймгийн Засаг даргын тамгын газрын түвшинд хийгдсэн ажлууд Монгол Улсын жирийн нэгэн өрх айлд очихдоо тал нь хүрч байна гэх шүүмжлэл байдаг. Тэгвэл төр засгийн бодлого шийдвэрүүд талын малчны хотонд бүтэн болж хүрэхэд, хүргэхэд орон нутгийн сонгууль чухал үүрэгтэй юм.

За мөн орон нутгийн сонгуультай зэрэгцэн яригдаж ирсэн асуудал бол талцал хуваагдал гэж болно. Нам  хүчнээрээ  талцаад  сум орон нутгийн  ард иргэдийг хуваагаад хүнд байдалтай болгож байгаа талаар, жирийн төрийн албан хаагч мөрөөрөө ажлаа хийж чадахгүй болтол хуваагдаж ирсэн тухай шүүмжийг  хэлэгсэд цөөнгүй байдаг. Түүнчлэн босоо удирдлагын тогтолцоо орон нутгийн хөгжилд чөдөр тушаа болж байгаа талаа, орон нутагт Засгийн газрын төлөөний түшмэдүүд л ажиллаж байна, орон нутгийн өөрийнх нь  бие даасан ажлын алба гэж алга байна гэх шүүмжүүд бас бий. Гэхдээ тэгээд иргэд маань өнөөдөр үндсэн хуулиар олгогдсон эрхээ эдэлж байна. Иргэд эрхээ эдэлж сонголтоо хийж байгаа цагт тулгамдсан асуудлууд шийдэгдэх биз ээ.

Эх сурвалж: Шуурхай.мн