“Нөгөө найрах арга чинь буруудаад байна” үгтэй дуу Хотын шинэхэн дарга Су.Батболдод зориулагдаа юу гэлтэй.  Засаг дарга Су.Батболдын санаачилгаар өнгөрсөн есдүгээр сарын 30-нд Сүхбаатарын талбайд болсон “Улаанбаатарын намар” нэгдсэн өдөрлөг, шоуны хүрээнд нийслэлээс гарсан зардал мөнгөний баримт дэлгэгдэж, асуудал үүсгээд байна. Үндэсний үйлдвэрлэгчид, үйлчилгээ эрхлэгчдээ дэмжих зорилго агуулсан гэх уг өдөрлөг, шоу үнэн хэрэгтээ урлаг соёлынхныг тэрдундаа “Камертон”, “Никитон” гэсэн рок попын хамтлагуудыг дэмжсэн шоу болоод өнгөрснийг зарцуулсан мөнгөний хэмжээнээс ойлгоод авчихад болохоор байгаа юм. Энэ хоёр хамтлаг нэр сүртэй байж болно.

Гэхдээ тэдэнд 100 саяыг зарцуулж байхын оронд, нийслэлийн захын дүүргүүдэд талх таллаад ч болов худалдаж авч чадахгүй байгаа, өлөн зэлмүүн амьдарч байгаа Монголынхоо үргэлжлэл болсон хүүхдүүдэд хүмүүнлэгийн хэлбэрээр тусламж болгоод олгочихсон бол харин нийслэлчүүд таатай хүлээж авах байлаа.

Гэтэл хотын дарга та өөр бодолтой хүн юм байна. Таны удирдаж байгаа Нийслэлийн ЗДТГ-ын Хэвлэл мэдээлэл, олон нийттэй харилцах хэлтсээс “Улаанбаатарын намар” шоуны өмнө мэдээлэхдээ “Тоглолтын үеэр  нийслэлийн Засаг дарга бөгөөд Улаанбаатар хотын захирагч С.Батболд ирэх дөрвөн жил  их хотоо хөгжүүлэхийн тулд ямар ажил хийхээр зорьж, төлөвлөж, үйл ажиллагааны хөтөлбөртөө оруулснаа нийслэлийн иргэд, төр захиргааны албан хаагчдад танилцуулна” гэж байсан.

Уучлаарай, та бүхэн иргэдийн сонголтыг авч нийслэлийн эрх мэдлийг гартаа атгахдаа Мөрийн хөтөлбөр биш худлаа баахан амлалт ярьсан юм уу. Тэгчихээд хөтөлбөр танилцуулахын төлөө нэг орой 217 сая төгрөг зарцуулдаг, яасан баян хоттой юм бэ, Улаанбаатарчууд бид чинь.

Улс оронд амаргүй байдалд байна, төсөв мөнгө хэцүү байна гэж засгийн түвшинд баахан яриад, хүүхдүүдэд өгөх мөнгөө дийлэнхийг нь больж, хүүхэд харах үйлчилгээг хүртэл зогсоох гэж байхад нийслэлийг удирдаж байгаа дарга та нэг л өдрийн дотор 200 саяар шоудаад байвал юу болох юм бэ.

Эрхэм дарга та ажлаа авснаас хойш нийслэлчүүдийн эрх ашигт нийцсэн хийгээд санаа оноонд нь хүрсэн зүйл бараг ярьсангүй. Ярихгүй байгаа юм чинь ямар ажлын ард гарах вэ. Яахав манайд ярьж шоудаад юу ч хийдэггүй дарга нар угаасаа олон. Гэхдээ яг хийх хүн бол ярьж байгаад хийдэг нь бас үнэн. Тэгэхээр эрхэм дарга танд эдгээр шинж тэмдгүүдийн аль нь ч харагдахгүй байх шиг.

Магадгүй та өөрөө бол зөв л зүйл хийж байгаа гэсэн итгэлтэй яваа байх. Гэхдээ та өөртөө дүн тавих бус, иргэд олон нийтийн мянга мянган нүд чих таныг чиглэж байгаа шүү дээ.

Эх сурвалж:Шуурхай.мн