Биеэ засаад гэрээ зас, гэрээ засаад төрөө зас гэсэн үг бий. “Макс “группын ерөнхийлөгч ноён Д.Ганбаатар дээрх үгийг санаж амьдардаг бололтой. “Хар” зах дээр наймаа хийж хөлжсөн гэгддэг Ганбаа захирал өдгөө хотын “А” зэрэглэлийн газрыг үнэ цохин авч, хувийн барилгуудаа сүндэрлүүлж чадснаараа  монголын бийлэгжүү эрсийн тоонд зүй ёсоор орно. Мөн тэрээр Монголын сайхан бүсгүй тэцээний алтан эрдэнийн өргөмжлөлт  Уянгалянхуаг гэргийгээ болгон олон эрчүүдийн зүрхийг шархлуулсан сүүхээтэй нь дэндсэн залуу.  Хосууд одоо хоёр охин, нэг хүүгийн эцэг эх бололцон “Нүхт”-ийн аманд дахь хоёр давхар хаустаа амьдардаг. Харин өнгөрсөн намар нуган үрийн зулай үнэрлэн магнайгаа хагартал баярласан мань хүнд “Биеэ бас гэрээ засчихлаа.  Одоо төрөө засна байгаа” хэмээн магтах, егөөдөхийн голоор үг унагах хүн олон байдаг аж. Д.Ганбаатар ерөнхийлөгч ч олны үгийг дуулгавартай хүлээж авч амьдралдаа хэрэгжүүлэхээр шийдсэн бололтой. Ямартай ч түүнийг ирэх УИХ-ын сонгуулиар Говь-Алтай аймгаас нэр дэвших гэж буй тухай яриа гараад амжжээ. Түүгээр ч барахгүй эртнээс замаа засч, “Макс” группын мэдэлд байдаг сүлжээ дэлгүүр, хоолны газрууддаа Говь-Алтайн залуусыг ажиллуулах болсон сурагтай.

А.Санчирмаа.Factnews