Ипотек тойрсон эсрэг тэсрэг мэдээллүүд гараад байна. Уг  зээлийн санхүүжилтын журамд өөрчлөлт оруулсан тухай мэдээлэл хэвлэлүүдээр гарсны араас Монголбанк мэдээлэл гаргажээ. Барилга, хот байгуулалтын яам, Монголбанк хамтран ипотекийн зээлийн олголтын журамд өөрчлөлт оруулж, батлагдсан гэх мэдээллийг үгүйсгэв.Монголбанк энэхүү журмыг батлахад хамтран оролцох байр суурьтай байгаа ч албан ёсоор илэрхийлээгүй байгаа гэнэ.

Тодруулбал: Барилга, хот байгуулалтын яамнаас ипотекийн зээлийн журамд өөрчлөлт оруулах тухай саналаа Монголбанкинд албан тоотоор ирүүлсэн бөгөөд уг саналыг Монголбанкны холбогдох удирдлагуудын түвшинд хэлэлцэж байгаа бөгөөд  хариу шийдвэр гаргаагүй байна.  Иймд ипотекийн зээлийн журам нь Монголбанкны байр суурь биш болохыг  мэдэгдэж байна гэсэн байгаа юм. Монголбанкны Захирлуудын зөвлөл өнгөрсөн долоо хоногоос эхлэн ипотекийн зээлийн санхүүжилтийн талаар илүү тогтвортой механизмыг бүрдүүлэхээр хуралдаж, зарчмын саналуудыг хэлэлцэж байгаа бөгөөд одоогоор эцсийн шийдвэр гараагүй гэх албан мэдээллийг өглөө.

Сануулахад, одоогоос 10 өдрийн өмнө таван хувийн хүүтэй ипотекийн зээлийг үргэлжлүүлэн олгохгүй гэсэн байр суурийг төв банкнаас илэрхийлсэн юм.  Өмнөх засгийн үед уг зээлийн санхүүжилтийн тухайд ТОСК-ийн удирдлага хэлэхдээ “Засгийн газар Тэтгэврийн санд өртэй. Тэгэхээр Засгийн газар Тэтгэврийн сантай гэрээ байгуулаад тийшээ орох ёстой мөнгийг ипотекийн зээл рүү оруулж, хүүнээс нь ашиг олох нь эдийн засагт эргээд тустай” гэх зүйлийг хэлж байсан санагдана. Тэгвэл  төв банк өөр байр суурьтайгаа илэрхийлсэн.

Эдийн засгийн нөхцөл байдал хүндэрч, төсвийн алдагдал нэмэгдэж, орлого тасалдаж буйтай холбогдуулан Төв банк зах зээлд их хэмжээний мөнгө нийлүүлэхгүй байх зайлшгүй шаардлага үүссэн. Үүнтэй холбоотойгоор бодлогын хүүг 4.5 нэгж хувиар нэмэгдүүлж 15 хувьд хүргэсэн билээ. Ингэж мөнгөний хатуу бодлого баримталж эхэлсэн учраас цаашид ипотекийн таван хувийн зээлээр дамжуулан мөнгөний нийлүүлэлтийг дэмжихгүй гэж Монголбанк үзэж байгаа юм.

Гэхдээ ипотекийн таван хувийн зээлийн хөтөлбөр нь Засгийн газраас баталсан журмын дагуу хэрэгждэг. Тийм учраас Засгийн газар тодорхой түвшинд эх үүсвэрээ шийдэж чадвал ипотекийн таван хувийн зээлийн хөтөлбөрийг үргэлжлүүлэх боломжтой. Өөрөөр хэлбэл, ипотекийн таван хувийн зээлийн хөтөлбөрийг үргэлжлүүлэх эсэх нь Засгийн газрын түвшинд шийдэгдэнэ гэж байна.

Тодотгоход, Төв банк арилжааны банкуудын ипотекийн зээлийн санхүүжилтэд шалгалт оруулсантай холбогдуулан зээл олголт тодорхойгүй хугацаагаар зогсоод байгаа юм.

Сүүлийн үед ипотекийн зээлтэй холбоотой хэд хэдэн асуудлаар иргэд тодорхой мэдээлэл авахыг хүсч байна. Монголбанк ипотекийн зээлийн санхүүжилтийг зогсоосон уу, цаашид зээл хэвийн олгогдох уу гэх зэрэг олон асуулт иргэдийн дунд  хүлээлт үүсгээд байгаа юм. Тэгвэл энэ талаар Төв банкны хэвлэлийн төлөөлөгч Д.Ариунаа “Монголбанк ипотекийн зээлийн санхүүжилтийг түр зогсоосон. Учир нь Төв банкнаас өнгөрсөн наймдугаар сард арилжааны банкуудад шалгалт хийсэн. Тодруулбал, арилжааны банкууд ипотекийн зээлийн санхүүжилтийг цаг хугацаанд нь гаргадаггүй өөр дээрээ хадгалсан, зориулалтын бусаар  зарцуулж байгаа зөрчил ажиглагдсан.  Үүнтэй холбогдуулан нэгдсэн журмаар шалгалт хийсэн.  Эдгээр зөрчлийг хэрхэн шийдвэрлэх вэ гэдгийг Монголбанк болон арилжааны банкуудын удирдлагын түвшинд хэлэлцэж байна. Ингээд нэгдсэн шийдэл гаргасны дараа ипотекийн зээлийн санхүүжилт үргэлжлэн олгогдоно”  гэж байсан юм.

Тэгвэл сүүлийн мэдээллээс үзэхэд Төв банк яамны саналыг ногоон гэрлээр хүлээж авахгүй байгаа бололтой байна.

Эх сурвалж: Б.Итгэл, Шуурхай.мн