С.ЗОЛБОО

Монгол Улс түүхэндээ хамгийн олон эмэгтэй гишүүдтэй боллоо. Тэр ч утгаараа хүн амын тэн хагас буюу 1.5 сая охид бүсгүйчүүдийг төлөөлөх, төрийн савраас хамгаалах үүрэгтэй  13 эмэгтэй төр түшилцэж байгаа юм. Гэхдээ тэд улс төрд орсныхоо хэргийг гаргаж чадахгүй явна. Өөрөөр хэлбэл, охид бүсгүйчүүдийн эрхийг хамгаалах үүргээ биелүүлж чадалгүй, ард түмний өмнөх анхны шалгуур, улс төрийн эхний алхам дээрээ бүдрэв. Тодруулбал, Гэр бүлийн хүчирхийлэлтэй тэмцэх хуулийг  хэрэггүй гэж үзсэн нь тэдний оноогоо алдах, иргэдийн итгэлийг хөсөрдүүлэх хамгийн том шалтгаан байлаа. Магадгүй ирэх дөрвөн жилийн өнгө нь үүгээр ч тодорхойлогдож мэдэх.

Эмэгтэй гишүүд дахиад л иргэдийн шүүмжлэлд өртөж. Учир нь УИХ-ын гишүүн М.Оюунчимэг,  Ц.Цогзолмаа, Б.Ундармаа, М.Билэгт, Н.Оюундарь, Г.Мөнхцэцэг нар   БНСУ-ын Үндэсний Ассамблейн гишүүн  Ким Ён Жүгийн урилгаар тус улсад айлчилж байгаа юм. Айлчлалын тухай Солонгосын хэвлэлээр байсхийгээд гарч. Гагцхүү өндөр дээд хэмжээний уулзалтад улсынхаа нэрийн хуудас болж яваа бүсгүйчүүдийн хувцаслалт олны шүүмжлэлд өртжээ. Тэрдундаа сошиалынхан эмэгтэй түшээдийн өнгө алагласан хувцаслалтад сэтгэл дундуур байгаагаа хэлж, үндэснийхээ хувцсийг өмсөхийг ч зөвлөсөн байна.

Эмэгтэй гишүүдэд танилцах судлах зүйл мэдээж байдаг л биз. Гэхдээ урдах ажлаа сайн хийж чадахгүй урьсан болгон руу гүйж очиж таарахгүй. Улсаа төлөөлж яваа бол ядаж л төрийн ёс дүрмээ сахих хэрэгтэй. Найзуудтайгаа зугаалж яваа бол өөр хэрэг. Хамгийн чухал асуудал бол элдэв айлчлал гэхээсээ илүү эхлээд үүргээ биелүүлж охид бүсгүйчүүдээ хамгаалчих. Түшээдийг тэнд зугаалж, уригдаж явахад энд охид бүсгүйчүүд хүчирхийлэлд өртөж амиа алдаж байна. Намынхаа даалгавраар Гэр бүлийн хүчирхийлэлтэй тэмцэх хуулийн эсрэг кноп дарчихаад зугаалж явах хэдхэн хоногийн хооронд хоёр ч бүсгүй харамсалтайгаар амиа алдлаа. Олонд мэдэгдсэн нь энэ болохоос дараад өнгөрсөн нь хэд байгааг мэдэхгүй. Хүний эрхийн хуульч М.Ичинноров “Гэр бүлийн хүчирхийлэлийн хуулийг хүчингүй болгож, Эрүү, зөрчлийн хуулийг хойшлуулсан арчаагүй улс төрчидтэй хариуцлага тооцож, хоёр эмэгтэйн алтан амийг нэхэх хэрэгтэй юм. Дарханд нэг эмэгтэйг нөхөр нь хоёр  цаг зодож алсан, хэн ч туслалцаа үзүүлээгүй. Сая бас 4 хүүхэдтэй жирэмсэн эмэгтэйг нөхөр нь зодож алсан байна. Ийм л учраас хүний эрхэд ээлтэй эрх зүйн системийг цогцод нь бүрдүүлэх хуулиудыг хийсэн билээ” гэсэн байна. Харгис нөхрийнхөө гарт хэрцгийгээр амиа алдсан хөөрхий бүсгүйчүүдийг хамгаалах, өмгөөлж дуугарах эрх нь төр түшилцэж яваа эмэгтэй гишүүдийнх юм шүү. Хүчирхийлэлд өртөж, үг хэлэх эрхээ хязгаарлуулсан, магадгүй маргааш ч харгис балмад этгээдийн гарт амиа алдаж мэдэх. Энэ амь бүгд түшээдийн гар бий.

Энэ оны хагас жилийн байдлаар гэр бүлийн хүчирхийллийн 764 гэмт хэрэг бүртгэгдэж, долоон хүн нас барсан нь өмнөх оныхоос мөн л 30.4 хувиар өссөн . Сүүлийн зургаан  жилд 90 гаруй хүн гэр бүлийн хүчирхийллийн улмаас амь насаа алдаад байгаа гэх та бүгдийн гар дээр тов тодорхой байгаа тоо баримт одоо хангалттай бишүү. Дахиад хуулийн төлөөсөнд охид, бүсгүйчүүдийн амийг “өгөх” ёсгүй.

Эх сурвалж: Зууны мэдээ