Эрх мэдэл, сүр хүч нь ил харагдахгүй ч, цаагуураа нөлөөлөл нь дэндүү томоор хэмжигдэх хүмүүсийн нэгийг Т.Бадамжунайг гэлцдэг. Ямартаа л Н.Энхбаярыг дагаад МАХН руу явсан Ж.Сүхбаатар хэлэхдээ  “Конторын, заалны улс төрөөс нийгмийн улс төр хүчтэй. Нам дамжсан ба хуулийн ажилтнуудын халхавчинд орсон луйварчид энэ улс орныг хэдий болтол дарлаж, доромжилж даврах вэ? Авлигачдад дайн зарлалаа гэдэг яагаад авилгын мафийн эзэд шорон орохгүй байна. Манай улсын авилгын загалмайлсан эцэг болох Т.Бадамжунай тэргүүлдэг. Тагнуул, цагдаа, АТГ, шүүх, шашин, нийслэлийн удирдлагад МАН, АН дамжсан далд сүлжээ хэрсэн. Т.Бадамжунай гэдэг мафи шоронд ороогүй цагт Монголд авилгачид жаргаж олон түмэн айдас доромжлол амссаар байх болно” хэмээн хэлж ярьж байсан удаатай. Харин Т.Бадамжунай түүний эл үгсэд хариу бариагүй ээ.

Тэгсэн ч тэр эрх мэдлээ гартаа атгасан чигээрээ, нөлөөллөө бэхжүүлсээр өдийг хүрч байгаа бололтой. Хэвлэлүүд түүний талаар янз бүрээр л бичиж байгаа. Жунайгийн мэдлийн хүмүүс томоохон газруудад очиж байгаа талаар нэр устай нь бичиж буй. Хамгийн сүүлд гэхэд Т.Бадамжунай  төрсөн охиноо Төрийн өмчийн хорооны Тамгын газрын даргаар суулгах гэж байна хэмээн яригдах болов. Чухам тэгээд удахгүй тодорхой болох биз ээ. За бас болоогүй том эрх мэдэлтэй Т.Бадамжунайтай Намбарын хүү уулзах гээд ч цаг авч чадахгүй байгаа гэх. Юм гэж сонин юм шүү.

Ер нь хараад байх нь ээ, Т.Бадамжунайг Ерөнхий менежер байхаас эхлэн нийслэлийн гэгдэх төрийн өмч нохойн замаар орж, газрын  наймаа гэдэг юм утгаараа цэцэглэж, бүр мафижиж, улстөрийг ч улам бохирдуулж, хамаг л муу бүхний суурийг тавьсан гэх мэдээллүүд байдаг аа. Уг нь Т.Бадамжунай нарын хэргийг шалгаж байгаа гэх мэдээлэл ганц нэг гарч байсан ч, төдийлөн өндөр авалгүй дарагдчихаад байдаг.  Бас болоогүй  Т.Бадамжунай эрхэм Ерөнхийлөгч Ц.Элбэгдоржтой ихэд шадарлаад байсан нь ганц хоёр жилийн өмнөх явдал.

Уг нь Т.Бадамжунайг хуучнаар Хүнс хөдөө аж ахуй, хөнгөн үйлдвэрийн яамны Жижиг, дунд үйлдвэрийг дэмжих сангийн 500 сая төгрөгийг зориулалтын дагуу ашиглаагүй, тодорхой хэмжээг нь хувьдаа завшсан гэх асуудлаар УМБГ-т шалгаж дуусаад Нийслэлийн прокурорын газарт шилжүүлсан гэх мэдээлэл 2013  оны хоёрдугаар сард гарч байсан ч бас л чимээгүй болсон. Мөн түүнийг “Хадгаламж банк”-ны 14.5 тэрбумын хэрэгтэй холбогдуулан шалгах ёстой байдаг ч, замхарсан. Бас  Спорт цогцолборын барилга барихаар авсан 450 саяын авлигын хэрэгт холбоотой  гэхчлэн олон хэрэг дуулдаад л өнгөрдөг жишиг тогтсон гэхэд болох юм.

Эх сурвалж: Шуурхай.мн