Хотын дарга асан Э.Бат-Үүлийн мэдэгдэл нийгмийн анхаарлыг татаад байгаа. Өөрийг нь С.Зоригийн амь насыг хохироосон гэх хэрэгт дахин яллагдагчаар татсан нь улстөртэй холбоотой гэж тэр хэлсэн. Тэгвэл өнөөдөр “Монгол ньюс” мэдээллийн төвд МУСГЗ Д.Сосорбарам тэргүүтэй Ардчилсан намын гишүүд хэвлэлийн  хурал зарлаж мэдээлэл хийлээ. Э.Бат-Үүлийг  С.Зоригийн амь насыг хөнөөсөн  хэрэгт холбогдуулан сэжигтнээр татаж буй нь сонгууль угтсан зохиомол гүтгэлэг хэмээн үзэж буйгаа мэдэгдлээ. Тэрбээр хэлэхдээ  “Бид хүний эрхийг дээдэлсэн нийгмийг байгуулж чадаагүй юм байна. Хүнд ёс бусаар халддаг.  Хууль нь КГБ-ын аргаар байна. Гэмгүй хүнийг буруутгадаг. Ял тулгадаг. Энэ өдрөөс хойш би дуугүй байхгүй. Одоо бид дуугарах цаг нь болсон. С.Зоригийн аллагын цаана хамтдаа зүтгэж явсан нөхрийг тэр хэрэгтэй хутгаж хаяад өөрсдөө ялалт байгуулсан. Үүний цаана бол гудманд яваа хүмүүс, энд цугласан бүгдийн эрх рүү шагайж байгаа буу гэж харж байна. Тиймээс дуртайгаар нь олон нийт рүү буу шагайлгахгүй. Өнөөдрийн өнгөн дээр ардчилсан, хүмүүнлэг энэрэнгүй үзлийг дээдэлдэг хүн сууж байгаа. Ц.Элбэгдорж ерөнхийлөгч бол бидэнтэй хамтдаа тэмцэж явсан, одоо ч энэ үйл хэрэгт ойр дөт байгаа хүн. Түүнийг бидний ардчиллын хүн гэхээсээ илүү Монгол Улсын Ерөнхийлөгч төрийн тэргүүнийх нь хувьд Ц.Элбэгдоржид хатуу шаардлага хүргүүлнэ. Энэ юу болоод байна вэ, та төрийн тэргүүний хувьд юу гэж үзэж байна вэ гэж асуумаар байна” гэлээ. Түүнчлэн Э.Бат-Үүлийг гэмт хэрэгт хилсээр холбогдуулан хэлмэгдүүлэх гэсэн ажиллагаагаа нэн даруй зогсоохыг шаардаж байгаагаа илэрхийллээ. Э.Бат-Үүлийн мэдэгдэлтэй холбоотойгоор талууд ийн байр сууриа илэрхийлцгээж байна. За мөн Ерөнхий сайд асан Н.Алтанхуяг энэ талаар үгээ хэлэхдээ  “Энэ хэргийн учир начир олдож заавал илрэх ёстой. Хэрэг илрэх шатандаа явж байна гэсээр нилээдгүй хугацаа өнгөрлөө. Өмнө нь энэ хэргийн дуулианыг олон удаа улс төрийн зорилгоор ашиглаж байсан” хэмээн хэлсэн байгаа юм.

Эх сурвалж: Шуурхай.мн