Төрийн албаны зөвлөлөөс зарим яамдын төрийн нарийн бичгийн даргын албан тушаалд томилогдох ажилтны сонгон шалгаруулалтыг зарлажээ. Тодруулбал, Гадаад харилцааны яамны Төрийн нарийн бичгийн даргын, Хууль зүй, дотоод хэргийн яамны Төрийн нарийн бичгийн даргын, Хүнс, хөдөө аж ахуй, хөнгөн үйлдвэрийн яамны Төрийн нарийн бичгийн даргын, Хөдөлмөр, нийгмийн хамгааллын яамны Төрийн нарийн бичгийн даргын, Уул уурхай, хүнд үйлдвэрийн яамны Төрийн нарийн бичгийн даргын, Эрүүл мэндийн яамны Төрийн нарийн бичгийн даргын албан тушаалд томилогдох ажилтны сонгон шалгаруулалт юм.  Сонгон шалгаруулалтанд өрсөлдөх иргэдийн материалыг  2016 оны 09 дүгээр сарын 09-ны өдөр  09.00-12.00, 13.00-17.00 цагийн хооронд хүлээн авна гэж байгаа. Төрийн албаны тухай хуулийн 10 дугаар зүйлд зааснаар тухайн зарлагдсан сул ажлын байранд тавигдсан 4 ерөнхий шаардлага (БОЛОВСРОЛ, МЭРГЭЖИЛ, МЭРГЭШИЛ, ТУРШЛАГА)-ыг бүгдийг нь хангасан иргэн л бүртгүүлэх боломжтой бөгөөд энэ нь тухайн иргэн “Баримт бичгийн шалгалт”-д “Тэнцсэн” гэсэн үнэлгээ авч байна гэсэн үг юм.

Нэг зүйлийг тодотгоход, зарим яамдын Төрийн нарийн бичгийн даргын албан тушаалыг түр орлон гүйцэтгэгчдийг Засгийн газар томилчихсон байгаа. Уг нь хуульдаа бол уг албан тушаалд томилогдох ажилтныг нээлттэй сонгон шалгаруулалт зарлаж, шалгалт авч томилох ёстой. Тэгвэл Хүнс хөдөө аж ахуй, хөнгөн үйлдвэрийн яамны Төрийн нарийн бичгийн даргыг түр орлон гүйцэтгэгч Л.Баяртулга, Эрчим хүчний яамны Төрийн нарийн бичгийн даргыг түр орлон гүйцэтгэгч М.Баярмагнай нарыг жинхлэх тухай яригдаж байгаа аж.