Рио-гийн олимпоос хүрэл медалийг атгаад алдсан Г.Мандахнаранд өнөөдөр Монголын чөлөөт бөхийн мастеруудын холбооноос алтан медаль, 20 сая төгрөг гардуулан өгчээ. Түүнийг Улаанбаатарт ирэхээс нь өмнө тус холбооны зүгээс Г.Мандахнаранд шижир алтаар медаль цутгаж өгнө хэмээн мэдээлж, хандив цуглуулах аян өрнүүлсэн юм. Чөлөөт бөхийн мастеруудын холбооны удирдах зөвлөлийн гишүүн Д.Алтанхуяг хэлэхдээ “Г.Мандахнаран бол энэ олимпийн наадамд бөх хүн яаж барилддагийг харуулсан. Чөлөөт бөхийн мастеруудын холбооноос Г.Мандахнарандаа урам өгөхөөр хандивын аян тав хоногийн хугацаанд өрнүүлж 19 хүн 20 сая 417 мянган төгрөг өгснийг өнөөдөр гардуулан өгч байна. Г.Мандахнарандаа 2020 оны олимпийн аварга болоорой гэж хүсэн ерөөе. Олимпийн медальтай олон шавь төрүүлээрэй, олимпийн аварга хүүтэй болоорой гэж ерөөе” гэсэн байна.  За мөн  “Хос гангийн оргил” ХХК-аас түүнд  таван сая төгрөгийн үнэ бүхий “Мizuno” брэндийн хувцас хэрэглэлийг гардуулан өгсөн байна.