Домогт Майкл Фелпсийг Риогийн усан замд ардаа орхиж чадсан ганц тамирчин нь Сингапурын Жозеф Скулинг байсан билээ. Тэрбээр домогт тамирчны хамгийн сүүлчийн хувийн гараандаа алтан медаль хүртэх боломжийг хаасны зэрэгцээ өөрөө олимпийн дээд амжилтыг тогтоож, мөн Сингапурын түүхэн дэх олимпийн анхны аварга болж бичигдсэн.

Тэгвэл нэгэн сонирхолтой түүх байдаг гэнэ. Жозеф Скулинг 13 настай байхдаа буюу 2008 онд Майкл Фелпстэй уулзаж, хамтдаа зураг даруулахыг гуйж явсан ажээ. Бээжингийн олимпийн өмнөхөн Майкл Фелпс Сингапурт очиж бэлтгэл хийх үеэр тэд нэг бассейнд таарсан юм байна.

Үүний дараагаар Жозеф Скулинг АНУ-ын Флорида руу гэр бүлийнхнийхээ хамт одож, тэндээ усан спортоор үргэлжлүүлэн хичээллэжээ. Харин Риогийн усан замд тэрбээр найман жилийн өмнө хамтдаа зураг даруулахыг гуйж явсан домогт тамирчинтайгаа уралдаж, улмаар түрүүлж чадсан юм.

Р.Гэгээ