Рио-гийн рингэн дээр тулалдаж, олимпийн хүрэл медалийг энгэртээ зүүсэн ОУХМ Д.Отгондалайгаар Монголчууд бахархаж байгаа. Тэрбээр мөнгөн медалийн төлөөх тулалдаанд шүүгчдээс ялалтын оноо авч чадаагүй ч, рингэн дээр илүүрхсэн гэдгийг нь хэн хүнгүй харж догдолж суусаан. Тэрчлэн боксын шүүлтийн талаарх шүүмж их байгаа. Тэгвэл Д.Отгондалай  Рио-гийн олимпийг сурвалжилж байгаа сэтгүүлчид тэр талаар өгүүлэхдээ  “-Ийм байдал ер нь тэмцээн болгонд л гардаг боллоо. Олон нийт телевизээр үзэж харж байгаа нь л энэ болохоос олон улсын тэмцээнд ялалтаа луйвардуулах, хүлээн зөвшөөрөхгүй ялагдал хүлээх тохиолдол олон байдаг. Тийм зүйлийн золиос болсон тамирчид олон байгаа. Өнөөдөр гэхэд 56 кг-ын жингийн ирланд боксчин Оростой тоглож ялагдсаныхаа дараа рингэн дээр хувцсаа тайлж орхиод, эсэргүүцлээ илэрхийлээд бууж байна. Шүүгчдэд хандаж. Тэр хүн бол бараг боксын спортыг орхих хэмжээний харамсал, үйлдэл үзүүлэх шиг боллоо. 2015 оны Дэлхийн аварга шалгаруулах тэмцээнд би хүрэл медалийн төлөө тоглоод бас л харамсалтай ялагдал хүлээж байсан. Олимпийн ринг, олимпийн шүүлтийг би арай илүү шударга байх болов уу гэж бодож байсан ч тиймгүй л юм байна. Шударга шүүлтийн өмнө бол Монголын боксчдын хэн нь ч айж эмээх, дутах зүйл байхгүй дээ, уг нь.”хэмээн ярьсан байна.