Эдийн засгийн нөхцөл  байдал тааруу байгаа нь дэлхийн түүхий  эдийн зах зээлийн таагүй дүр зурагтай холбоотойгоос  гадна өмнөх засгийн үед төсөв, мөнгөний бодлогыг буруу залсантай холбоотой гэх зүйлийг өнөөгийн эрх баригчид хэлээд байгаа. Түүнчлэн мөнгөний бодлогыг хэрэгжүүлэгч төв банкны алхам, шийдвэрүүд юу байж ирсэн бэ, эдийн засаг дахь нөлөөлөл нь хэрхэн яаж гарах вэ гэдэг асуудал анхаарал татах нь зүй ёсных. Монголбанк энэ он гарсаар бодлогын хүүг 2 удаа бууруулах шийдвэр гаргасан. Чухам харин бодит эдийн засаг дахь нөлөөлөл нь хэзээ тоймтой мэдэгдэх вэ гэдэг асуудал чухал. Тэгвэл Монголбанкны Мөнгөний бодлогын газрын захирал Д.Болдбаатар энэ талаар хэлэхдээ “Мөнгөний бодлогын хүү бууруулсан шийдвэрүүд нь оны сүүлийн хагаст бодит эдийн засгийн идэвхжилийг тэтгэх үүрэгтэй байх юм. Төсвийн тодотголоор сангийн бодлогын тохиргоо хийж чадвал бодлогын хүүний энэ нөлөө илүү сайн үр дүнтэй байх болно.Төсвийн зарлагыг бууруулах нь хувийн хэвшлийн зээлийн эх үүсвэрийг чөлөөлж өгөхөөс гадна төгрөгийн өгөөжийг нэмэгдүүлж валютын ханш сулрах дарамтыг бууруулахад чухал ач холбогдолтой бодлогын тохиргоо болоод байна. Мөнгөний бодлогын шийдвэр өөрөө ирээдүйд аажуу нөлөөлдөг бол сангийн бодлогын өөрчлөлт түргэн хугацаанд нөлөө үзүүлэх чадвартай байдаг.” хэмээн хэлсэн байна.

Эх сурвалж: Шуурхай.мн