Уржигдар 21 настай итали залуу Фабио Басиле жүдо бөхийн 66 кг-ын жинд олимпийн аварга болсон. Басиле жинхэнэ битүү морь хэрхэн давхиж, түрүүлж болдгийг дэлхий дахинд харуулсан гэж болно. Түүний хүртсэн алтан медаль Италийн түүхэн дэх олимпийн 200 дахь алтан медаль болсон юм билээ.

Басиле гялалзсан, царайлаг, булчинлаг, эрч хүч нь амтагдсан залуугийн барилдааныг үзсэн хүмүүс санаж буй биз. Тэгвэл энэ залуу олимпийн аварга болчихоод юу ярьсныг хүргэж байна.

“Гайхамшигтай жил байлаа. Та бүхэн төсөөлж байна уу? Миний нэр жилийн өмнө л дэлхийн чансаанд ч байгаагүй юм шүү дээ. Би үүнд үнэхээр “шатаж”, бухимдаж байж билээ. Гэвч би энэ бухимдал, хүлээлтээ хүчин чармайлт болгож, эргээд өрсөлдөгчдийнхөө эсрэг хүч болгон ашиглаж чадлаа. Олон хүн намайг амжилтад хүрэхгүй гэж хэлж байсан. Тэгвэл би тэр хүмүүст энэ медалиа харуулья. Миний хүзүүнд байгаа алтан медалийг минь харж байна уу, та нар. Дэлхий тэр чигээрээ харж байгаа.

Намайг 2020 оны Токиогийн олимпийн наадамд бэлдсэн нь дээр гэхэд би “Үгүй ээ, Риод би оролцоно” гэж хэлсэн юм. Тэгээд л ажиллаж, хөдөлмөрлөсөн. Магадгүй би хүссэнээ ч өндөрт гарчихсан байх. Гэвч дахиад дээш өгсөхийг би хүсч байна” хэмээн Басиле өгүүлжээ.

Р.Гэгээ