Үндэсний их баяр наадамдаа амжилттай сайхан барилдаж, Монгол Улсын арслан цол хүртсэн Р.Пүрэвдагва  “Зууны мэдээ” сонинд ярилцлага өгчээ. Сэтгүүлч түүнээс наймын даваанд П.Бүрэнтөгс арсланд амлуулж барилдсан барилдааных нь талаар тодруулан асуухад тэрбээр  “-Бид хоёр яалт ч үгүй хайнцсан. Цэц ч тийм шийдвэр гаргаж дахин барилдахад би барьц сонгож арсланг хаясан. Болсон үйл явдал монгол бөхийн дүрмийн дагуу өрнөсөн. Тэрнээс этгээд хачин зүйл болоогүй. Дахиж барилдах явц удааширч бид хоёрын барилдааны талаар янз бүрийн дүрс бичлэг олонтаа цацагдснаас бас цаг оройтсноос наадамчид жаахан тэсвэр алдсан тал бий байх. П.Бүрэнтөгс арслан бид хоёрын хооронд хувийн ямар нэг маргаан байгаагүй.”  хэмээн хариулсан байна. Түүнчлэн тэрбээр “-Спортыг хөгжөөн дэмжигчидгүйгээр төсөөөлдөггүй шүү дээ. Намайг дэмжиж уухайлсан их цуурай давалгаалсан явдал надад маш их урам хайрласан. Үүнийг нь ч би давчихаад дэвээнийхээ үеэр илэрхийлж чадсан гэж бодож байгаа. Хамгийн гол нь монголчууд маань надад итгэл өгч байгаа юм байна гэсэн сэтгэгдэл төрсөн. Өндөр даваанд хүрч барилдах замыг минь олон түмэн засч өгсөнд билгэшээж явна.” хэмээн өгүүлжээ.