Мэргэжлийн сумогийн их аварга Д.Дагвадорж  хэлснээ хийдэг, ажил хэрэг болгодог нэгэн гэдгээ өнөөдөр дахин бататгаж байна. Учир нь тэрбээр  Монгол-Японы хамтарсан Гүүний эхэс боловсруулах үйлдвэрийнхээ нээлтийг өнөөдөр хийлээ. Их аварга өнгөрсөн дөрөвдүгээр сард хэвлэлд өгсөн ярилцлагадаа эхэс боловсруулах үйлдвэрийн талаар, эхэсийн ач холбогдлын талаар сонирхолтой зүйлийг өгүүлж байсан билээ. Тэр хэлэхдээ  “Эхэс бол эрдэнэ юм. Малаа хайрлаж өсгөж, үржүүлэх хэрэгтэй. 200 гүүтэй айлд ямар орлого очих нь вэ. Зөвхөн манай компани гэхэд малчдыг дэмжих тал дээр бас хөөрхөн мөнгө оруулаад явж байна. Малаасаа гардаг нэг зүйлийг ч гэсэн үнэтэй болгож, өөр төвшинд бүтээгдэхүүн үйлдвэрлэж байна. Энэ чинь сайхан үйл хэрэг шүү дээ… Зөвхөн гоо сайханд төдийгүй хөгшрөлтийн эсрэг тарианууд, үе мөчний зөөлөн шингэнийг нөхөх бүтээгдэхүүн хийж байгаа. Манай орон эрс тэс уур амьсгалтай, өвдөгнөөсөө их даардаг. Түүнээсээ болж эрүүл мэндийн эрсдэлд ордог шүү дээ. Мөн нэмж нүүрний коллаген эссенциалуудыг бүгдийг нь хийнэ” хэмээн ярьсан байсан юм.

Тус үйлдвэр  өнгөрсөн жил туршилтын журмаар дөрвөн тонн эхэс цуглуулан, Япон руу гаргаж, шинжилгээний хариу нь сайн гарсан юм байна. Эхсээ маш нарийн шалгаж, ширхэгийг нь 30 мянган төгрөгөөр авдаг аж. Энэ жилийн хувьд 20 тонн эхэс авах бөгөөд цэвэрхэн, үнэр ороогүй, хөлдөөсөн байх ёстой гэсэн шаардлага тавигддаг юм байна.

Тэгэхээр одоо ингээд эхэс боловсруулах үйлдвэрээ нээчихэж байгаа тул, хүмүүст ихээхэн хэрэгтэй бүтээгдхүүнүүд хэрэглэгчдийн гарт хүрч таарах биз ээ.Боловсруулах үйлдвэрээ 22-ын товчоо орчимд япон стандартаар барьж байгуулсан аж. Ингэхдээ улсаас нэг  ч төгрөгийн зээл аваагүй гэж байна.

Эх сурвалж: Шуурхай.мн