Мэргэжлийн гэх тодотголтой Засгийн газрын бүтцийн зураглал тодорч эхэлсэн байна. Ж.Эрдэнэбатын  кабинетын сайд нарын  4 нь давхар дээлтэй байх боломжтой. Чиглэлийн дөрвөн яамыг удирдах хүмүүсийг УИХ-ын гишүүн байхыг хаа хаанаа хүлээн зөвшөөрсөн. За харин бусад яамдын тухайд дан дээлтэй нөхдүүд сайдын албыг хаших ёстой байгаа. Ерөнхийлөгч Ц.Элбэгдоржтой  Ерөнхий сайд Ж.Эрдэнэбат уулзах үедээ хэлэхдээ  “Мэргэжлийн Засгийн газар гэдэг бол тухайн салбартаа дадлага туршлагатай, тэндээ ажиллаж туршлага хуримтлуулсан, салбараа мэддэг хүнийг ажиллуулахыг хэлнэ. Тухайн салбарт ажиллаж байгаагүй буюу өөр мэргэжлийн хүн бол мэргэжлийн бус гэж үзэж байгаа. Засгийн газрынхаа бүтцийг хийхдээ аль болох цомхон, цөөхөн, чадварлаг бүтцээр ажиллая. Давхар дээлийн зарчмыг та ч гэсэн шүүмжилж байсан. Бид ч шүүмжилж байсан. Тийм учраас үүнийг өнөөгийн байгаа түвшингээс харьцангуй бууруулна. Үндсэн чиг үүргийн яамдын сайд УИХ-ын гишүүн байх нь ажил явуулахад дөхөмтэй гэж үзсэн… Үндсэн чиг үүргийн 4 яам байгаа. Байгаль орчин, Хууль зүй, Гадаад харилцаа, Сангийн яам байна.” хэмээн хэлж байсан билээ. Тэгэхээр энэ дагуу асуудал явагдах нь тодорхой байгаа. Харин яамдын тооны тухайд эх сурвалжуудын мэдээллээс үзэхэд Ерөнхий сайдыг оролцуулаад 17 сайд, 13 яамтай байхаар төлөвлөж хуулийн төслийг боловсруулсан гэх мэдээлэл байгаа юм. Тодруулбал, Монгол Улсын Ерөнхий сайд, Монгол Улсын Шадар сайд,  Монгол Улсын сайд, Монгол Улсын Засгийн газрын хэрэг газрын дарга,Байгаль орчин, аялал жуулчлалын сайд,  Гадаад харилцааны сайд,Сангийн сайд,Хууль зүй, дотоод хэргийн сайд, Хөдөлмөр, нийгмийн хамгааллын сайд,Батлан хамгаалахын сайд,Барилга хот байгуулалтын сайд,Боловсрол, соёл, шинжлэх ухаан, спортын сайд,Зам тээврийн сайд, Уул уурхай, хүнд үйлдвэрийн сайд,  Хүнс хөдөө аж ахуй, хөнгөн үйлдвэрийн сайд,Эрчим хүчний сайд, Эрүүл мэндийн сайдыг тус тус томилно гэх мэдээлэл байна.

Тэгэхээр эхэнд өгүүлсэнчлэн 4 нь чиг үүргийн яамд байгаа. Ер нь бол зарим яамдыг нэгтгэнэ гэх мэдээлэл эхнээсээ гарч байсныг энд хэлэх хэрэгтэй. Ямартай ч өнөө маргаашдаа багтаад Засгийн газрын бүтцийг парламентад өргөн барьж таарах болов уу.

Эх сурвалж: Шуурхай.мн