Бүрэн, дунд боловсролыг эзэмшээд их дээд сургуульд элсэн суралцахаар сурагчид конкурс өгдөг байлаа. Харин сүүлийн хэдэн жилүүдэд Элсэлтийн ерөнхий шалгалт хэмээн нэр нь өөрчлөгдөж, онооны хувьд ч өөр үнэлгээтэй болсон конкурсыг өгдөг болсон. Тэгвэл энэхүү ЭЕШ нь хэл ам дагуулав. “Шалгалтын хариу задарлаа” гэсэн маргаан өмнөх жилүүдэд ч гарч эцэг эхчүүдийг бухимдуулж, олон сурагчдын хүч хөдөлмөр талаар болж буй талаар гомдол газар авах болсон.

Энэ жилийн хувьд ч шалгалтын материалын хариуг шалгалтад орохын 20-30 минутын өмнө задарч хүүхдүүдэд зарж байгаа талаар мэдээлэл сошалд цацагдаж эхэлсэн. Харин энэхүү мэдээлэлд БҮТ-өөс албан ёсны тайлбар хийхдээ, шалгалттай холбоотой буруу ташаа ойлголт төрүүлсэн, иргэдийг төөрөгдүүлсэн зарим мэдээлэл олон нийтийн дунд гараад байна. Тухайлбал, шалгалтын материал задарсан худалдаж авч байна гэсэн мэдээлэл гарсны дагуу БҮТ-өөс холбогдох цагдаагийн байгууллагатай хамтарч хяналт шалгалт хийж энэ мэдээлэл нь худал бөгөөд зарим нэг ашиг хонжоо хайгч этгээдүүд хүүхдүүдийн сэтгэл зүйг ашиглаж амар хялбар аргаар ашиг, мөнгө олох зорилготой хууран мэхлэх, залилан хийж байсан нь тогтоогтоод холбогдох газраар шалгуулж байгаа.

ЭЕШ-ын сэдэв, даалгавар нь задрах нууцлал алдагдах боломжгүй бөгөөд тус ажлыг ЦЕГ, ТЕГ-тай хамтарч тэдний бүрэн хяналт, хамгаалалт дор зохион байгуулдаг. Иймд нийт шалгуулагч, эцэг эхчүүдэд анхааруулахад дээрх худал ташаа мэдээлэлд итгэж эдийн засаг болоод бие, сэтгэл санаагаар хохирохгүй байхыг сануулж шалгуулагчид зөвхөн өөрөө өөртөө итгэж мэдлэг чадвараа бодитой үнэлүүлж шалгалтандаа амжиллтай дүн үзүүлэхийг хүсье” хэмээсэн.

Энэ сарын 19-ны өдөр шалгалтын хариу задарч, худалдсан нь математикийн шалгалтын хариутай таарч байгаа талаар Хүнбиш Сайнбилэг багш өөрийн цахим хуудсаараа дамжуулж мэдээллээ. Тэрбээр “ЭЕШ түлхүүр задарсан гээд байхаар итгэхгүй байсан чинь өөрийн биеэр шалгаж үзлээ. Үнэн байна. ЭЕШ дахин явуулья. Бид нар ер нь ямар нийгэмд амьдраад байгаа юм бэ?. Хариу нь бүр яг таар ч байгаа юм даа. Дээр бичсэн нь сонгох тест 4 гэвэл D. 1 гэвэл А хариу юм байна. Доогуур бичсэн код нь нөхөх тест. Шалгаад үзсэн яг таарлаа. Тэгээд цаас нь дээр наадаг кодтой адилхан болохоор хэн ч анзаарахааргүй” гэсэн юм.

Эцэг эхчүүд шалгалтын материалын хариу задарсан хүүхдүүд нийлж 300-500 мянган төгрөгөөр худалдаж авсан гэж ярьж хүүхдүүд маань шалгалтаасаа гарч ирээд сэтгэл санаагаар унаад байна гэж байсан нь үнэний ортой бололтой.

Өнөөдөр шалгалтын хариу задарсан талаар мэдээллийг олон нийтэд зарлаж, дахин ЭЕШ-ыг явуулж өгөхийг шаардсан хэвлэлийн бага хурал болно.

Энэ талаар эргэн мэдээлэх болно

Эх сурвалж: Х.Даваа Dorgio.mn